کابل ټکی کام (سه شنبه، ۲۵ وږی، ۱۴۰۴ل)
د اسلامي امارت د دفاع وزیر مولوي محمد یعقوب مجاهد د خپل رسمي سفر پر مهال د قطر د بهرنیو چارو له وزیر الدکتور محمد بن عبدالعزیز الخلیفي سره کتلي دي.
د اسلامي امارت مرکزي وياند مولوي ذبيح الله مجاهد په خپل رسمي ټويټر (اکس) اکاونټ ليکلي، چې په دې کتنه کې د دواړو هېوادونو ترمنځ د اړیکو او همکاریو په اړه خبرې او بحثونه شوي دي.
دغه راز نوموړي زياته کړې، چې د قطر له ولس او حکومت سره د اسلامي امارت د ملاتړ او همدردۍ ټینګار هم شوی دی.
دا لیدنه په داسې حال کې ترسره کېږي، چې څو ورځې مخکې د اسرائيلي الوتکو په بمبار کې د قطر په پلازمېنه دوحه کې د حماس د مذاکراتي پلاوي پنځه غړي او یو تن قطري تبعه شهیدان شوي وو.
