کابل ټکی کام (سه شنبه، ۱۵ تله، ۱۴۰۴ل)
د خلیل الحیة په مشرۍ د حماس اسلامي غورځنګ پلاوي د منځګړو هېوادونو له استازو سره په مصر کې د شرمالشیخ ښار کې د خبرو لومړۍ غونډه ترسره کړه.
د الجزیرې تلویزیون د سرچینو په وینا، دغه غونډه د مثبتې فضا په ترڅ کې ترسره شوه او دواړو لورو د روانو خبرو د لړۍ لپاره د “لار نقشه” او کړنلاره وټاکله.
د سرچینو د معلوماتو له مخې، د حماس پلاوي منځګړو ته څرګنده کړې، چې د صهیونیستي رژیم له لوري د غزې پر وړاندې روان بمبار او نظامي بریدونه د بندیانو د تبادلې پروسې پر وړاندې جدي خنډونه جوړوي.
په دې ناسته کې د حماس له لوري دوه هغه غړي هم شامل وو، چې څو ورځې وړاندې په دوحه کې د صهیونیستي برید هدف ګرځېدلي وو خو له هغې بريد څخه ژوندي وتلي دي — خلیل الحیه او زاهر جبارین.
د حماس دریځ ته نږدې سرچینې وايي، د حماس پلاوي منځګړو ته روښانه کړې، چې غورځنګ د خپلو ژمنو پابند دی، خو د هر پرمختګ لپاره د جګړې درېدنه بنسټیز شرط ګڼي.
د دوی په وینا، “تر هغه چې جګړه نه وي بنده شوې او د هغې د دوام د نه تکرار تضمین نه وي شوی، هېڅ تړون عملي کېدای نه شي.”
سرچینې زیاتوي، چې د خبرو دویم پړاو به د روانو امنیتي او سیاسي مشورو له بشپړېدو وروسته ترسره شي.
