کابل ټکی کام (سه شنبه، ۱۵ تله، ۱۴۰۴ل)
د اسلامي امارت د بهرنیو چارو وزیر مولوي امیر خان متقي د روسیې فدراسیون په رسمي بلنه د افغانستان په اړه د مسکو فارمټ مشورتي غونډې په اووم پړاو کې د ګډون لپاره مسکو ته تللی دی.
د افغانستان د بهرنیو چارو وزارت په وینا، دا لومړی ځل دی چې د اسلامي امارت د بهرنیو چارو وزیر د یادې غونډې په رسمي ډول برخه اخلي. په دې ناسته کې به د سیمې د بېلابېلو هېوادونو استازي ګډون ولري.
ټاکل شوې ده چې مولوي متقي به په غونډه کې د افغانستان او سیمې د اړیکو د پراختیا، همکارۍ او ثبات د ټینګښت په اړه د اسلامي امارت دریځ او لیدلوری وړاندې کړي.
