کابل ټکی کام (سه شنبه، ۲۹ تله، ۱۴۰۴ل)
د اسراییلي ورځپاڼې معاريف د دوشنبې په راپور کې راغلي، چې له اسراییلو بهر ته د تښتېدونکو کسانو شمېر په بېساري ډول زیات شوی او اوس یې کچه تاریخي ریکارډ ته رسېدلې ده. د راپور له مخې، ډېری هغه کسان چې له هېواده تښتي، بېرته نه راګرځي، بلکې یوازې یوه کوچنۍ برخه یې اسراییلو ته ستنېږي.
ورځپاڼه لیکي، د اسراییلي پارلمان «کنسټ» د څېړنې او معلوماتو مرکز په خپل تازه راپور کې څرګنده کړې، چې د هېواد پرېښودونکو ډېری برخه د لوړو زده کړو لرونکي ځوانان دي، چې عمرونه یې د ۲۰ او ۳۹ کلونو ترمنځ دي.
د رسمي شمېرنو له مخې، د ۲۰۰۹ او ۲۰۲۱ کلونو ترمنځ هر کال شاوخوا ۳۶ زره کسان له اسراییلو تښتېدلي، خو له ۲۰۲۲ کال وروسته په دې بهیر کې چټک بدلون راغلی دی.
راپور زیاتوي، چې یوازې په ۲۰۲۲ کال کې ۵۵ زره اسراییلیان له هېواده تښتېدلي، چې دا د تېر کال په پرتله ۴۶ سلنه زیاتوالی ښيي، او په ۲۰۲۳ کال کې دا شمېر نږدې ۸۳ زرو ته رسېدلی، چې بله ۵۰ سلنه لوړېدنه ده.
معاريف لیکي، د ۲۰۲۳ کال د اکتوبر له جګړې وروسته د تښتېدو لړۍ نوره هم چټکه شوې، او کارپوهان وایي دا بهیر د اسراییلو د کار ځواک، اقتصاد او ټولنیز ثبات لپاره جدي ګواښ بلل کېږي.
