کابل ټکی کام (سه شنبه، ۲۹ تله، ۱۴۰۴ل)
د یمن د انصارالله اسلامي غورځنګ مشر “سید بدرالدین عبدالملک حوثي” خبرداری ورکړی، که اسرائیلو د غزې د اوربند تړون مات او جګړه بېرته پیل کړي، نو یمني ځواکونه به پرې سخت او خونړي بریدونه ترسره کړي.
هغه په خپله وروستۍ وینا کې ویلي، چې یمني ځواکونو ټول قطعات لا هم په جګړه ییز حالت کې دي او د هرې احتمالي سرغړونې پر وړاندې د غبرګون توان لري.
نوموړي زیاته کړې «که د صهیونیستي دښمن له لوري اوربند مات شي، زموږ ځواب به سخت او خونړی وي، دښمن به له داسې بریدونو سره مخ شي چې تصور یې نه شي کولی.»
عبدالملک حوثي زیاته کړې، د یمن د انصارالله حرکت د فلسطین د مقاومت ترڅنګ ولاړ دی او د اوربند د هر ډول سرغړونې په صورت کې به له خپلو «دیني او انساني مسؤولیتونو» سره سم عمل وکړي.
انصارالله اسلامي غورځنګ له تېرو ۲ کلونو راهیسې د غزې د جګړې پر مهال پر اسرائیلي اهدافو او بحر احمر کې پر کښتيو بریدونه ترسره کړي، چې د نړۍ د تجارت پر امنیت یې ژور ژور اغېز کړی دی.
