کابل ټکی کام (جمعه، ۹ لړم، ۱۴۰۴ل)
د افغانستان د اسلامي امارت مرکزي ویاند مولوي ذبیح الله مجاهد ویلي، چې د اسلامي امارت پلاوي د ترکیې او قطر د وروڼو هېوادونو په غوښتنه او منځګړیتوب د پاکستاني لوري سره په استانبول کې څو ورځې خبرې وکړې، چې دا خبرې پای ته رسېدلې دي.
نوموړي زیاته کړې، اسلامي امارت د دغه بهیر د منځګړیتوب او تسهیل په برخه کې له ترکیې جمهوریت او د قطر له دولت څخه مننه کوي.
مجاهد ویلي، اسلامي امارت له پیل څخه په ډيپلوماسۍ او تفاهم باور درلود، نو له همدې امله یې د یوه جامع او مسلکي ټيم په ټاکلو سره دا خبرې په رښتینولۍ او زغم تعقیب کړې دي.
هغه ټینګار کړی، چې اسلامي امارت له ټولو ګاونډیو هېوادونو سره د ښو اړیکو غوښتونکی دی او له پاکستان سره هم د دوه اړخیز درناوي، نه لاسوهنې او نه ګواښ پر اصولو ولاړې اړیکې غواړي.
د مجاهد په وینا، د استانبول خبرې چې یوه پېچلې پروسه وه، د دې هوکړې په تایید پای ته ورسېدې چې دواړه لوري به په راتلونکي کې بیا مجلس کوي او پاتې موضوعات به تر بحث او غور لاندې نیسي.
