کابل ټکی کام (شنبه، ۱۷لړم، ۱۴۰۴ل)
نن غواړو ستاسو سره په ترکیه کې د مذاکراتو وروستی جریان، همدا ډول د پاکستان د طالبانو د تحریک ټي ټي پي د مینځته راتلو او یو لړ نورو مسائلو په اړه معلومات شریک کړو.
داسې بریښي چې متأسفانه په پاکستان کې ځینو خاصو پوځي کړیو ته په افغانستان کې مرکزي قوي حکومت، امنیت، پرمختګ او په عموم کې سوله او ثبات ښه نه ایسي، ځکه دوی تل د افغانستان له نا امنۍ، اشغالونو، مهاجرتونو او مجبوریتونو څخه ګټه پورته کړې، نن بیا غواړې د یو لړ بهانو په تراشلو سره له افغانستان سره ځان په ستونزه کې واچوي.
موږ پوهیږو چې د دغې خاصې پوځي ډلې له افغانستان ضد سیاستونو سره نه د پاکستان متدین ولس، نه سیاسي احزاب او نه هم علماء کرام موافق دي.
دغه کړۍ په اسلامي امارت باندې ناسم تورونه پورې کوي، نړۍ ته داسې ښيي چې ګویا د پاکستان نا امني او د پاکستان د طالبانو تحریک (TTP) په افغانستان کې د اسلامي امارت له راتګ سره جوخت پيل شوي، په داسې حال کې چې دغه نا امني او د ټي ټي پي شتون له (۲۰۰۲) څخه را په دې خوا پيل شوې او علت یې هم د پاکستاني پوځیانو هغه ناسم سیاستونه وو چې هغه مهال یې له امریکا سره ځان په اتحاد کې ګډ کړ او بیا یې امریکایانوته اجازه ورکړه چې په وزیرستانونو او قبایلو کې ډرون بریدونه وکړي او پخپله یې هم د وزیرستان له بیچاره خلکو سره دښمني را واخیسته، په ځلونو یې د هغوی په ضد لوی او واړه عملیات اعلان کړل، خلک یې ووژل، کورونه یې وران کړل او د قبایلو په خلکو یې زندانونه ډک کړل.
دلته غواړو چې د پاکستان د پوځ او بیچاره پښتنو قبائلو ترمنځ د تیرو کلونو د جګړو څو نمونې یادې کړو، ترڅو روښانه شي چې د ټي ټي پي موضوع د نن او پرون موضوع نه ده او داچې دا موضوع په افغانستان او ځانکړي توکه د اسلامي امارت پورې هيڅ اړه نه لري.
په قبائلي سیمو کې له خلکو او ټي ټي پي سره د پاکستان د پوځ د عملیاتو او جګړو مختصره یادونه:
په ۲۰۰۲ م کال کې د ټي ټي پي تحریک د پاکستاني پوځ لخوا امریکا ته په وزیرستانونو باندې د خلاص مټ بمبارۍ او ډرون بریدونو په غبرګون کې رامنځته شو.
چې بیا یې پاکستاني ځواکونو له هغه وخته تر اوسه پورې په وړاندې بیلابیل عملیات او بریدونه کړي، همدا ډول د ټي ټي پي لخوا هم له هغه وخته تر اوسه په پاکستان کې لوی او واړه بریدونه ترسره شوي دي.
۱ـ پاکستاني پوځ په لومړي ځل په ۲۰۰۲ کال د مارچ په میاشت کې په جنوبي وزیرستان، شمالي وزیرسان او اورکزی اجنسۍکې د ټي ټي پي په ضد د (OPERATION AL – MIZAN)( المیزان) په نامه عملیات اعلان او ترسره کړل چې نتیجه کې یې د پاکستان په دننه کې تر ۸۰۰۰۰ زره ځایي خلک بيځایه شول.
۲ـ په ۲۰۰۷ کال کې پاکستاني پوځ په سوات او ملاګند کې د ټي ټي پي په وړاندې د ( راه راست) په نامه عملیات اعلان کړل چې له امله یې د سوات او مالاکنډ څلور لکه خلک ګډوالۍ ته مجبور شول او یو شمېر ګډوال د افغانستان نیږدې سیمو ته هم را واوښتل چې د هغه وخت حکومت دیورند کرښې ته نیږدې ځاي په ځاي کړل.
۳ـ په ۲۰۰۸ کال کې پاکستاني پوځ په باجوړ اجنسۍ کې د ټي ټي پي په مقابل کې د (OPERATION SHER DIL) (د زمري زړه) په نامه عملیات اعلان کړل چې نږدې شپږ لکه خلک یې مهاجر کړل.
۴ـ د ۲۰۰۹ کال اکتوبر میاشت کې پاکستاني پوځ په جنوبي وزیرستان کې بیا د ټي ټي پي په وړاندې د ( نجات ) په نامه عملیات اعلان کړل چې تقریباً له درې تر څلور لکو ځایي خلک یې کډوالي ته مجبوره کړل.
۵ـ د ۲۰۱۱ کال په جولای میاشت کې پاکستاني پوځ په کرمه اجنسۍ کې د ټي ټي پي په ضد د سپین غر( کوه سفید) په نامه عملیات اعلان کړل چې په نتیجه کې یې شاوخوا یو لک ځایي خلک کډوالي ته اړ کړل.
۶ـ د ۲۰۱۴ د جون میاشتې په ۱۵ نیټه پاکستاني پوځ په شمالي وزیرستان کې د ټي ټي پي په مقابل کې د ضرب عضب (غضب) په نامه عملیات اعلان کړل چې له امله یې تقریباً تر یو میلیون پورې خلک بیځایه شول چې تر نیمایي زیات یې له دیورند کرښې دې خوا را واوښتل او د هغه وخت حکومت د یادو قبائلي مهاجرینو لپاره په خوست او پکتیکا کې کمپونه جوړکړل.
۷ـ پاکستاني پوځ له ۲۰۱۴ تر ۲۰۱۷ کال پورې د خیبر اجنسۍ تیرا او باړه سیمو کې د ټي ټي پي او قبائلو په وړاندې د خیبر ۱،۲،۳،۴ په نامه عملیات وکړل چې په نتیجه کې یې له درې تر پنځه لکه خلک له خپلو سیمو کډوالي ته مجبور شول چې ډېره برخه یې ننګرهار ولایت ته را غلل او د تېرې ادارې له خوا په اړونده سیمه کې ځای پر ځاي شول.
د عملیات میزان په اړه راپور:
د اسلامي امارت له واکمني مخکې په افغانستان کې د میشتو مهاجرینو په اړه راپور
دا هغه حقایق او مستند معلومات دي چې ښيي پاکستاني پوځ د اسلامي امارت له راتګ مخکې هم له پښتني قبایلو او TTP سره په جګړه کې ښکیل وو. د اسلامي امارت تر راتګ د مخه دوی په دې خبره اعتراف کاوه چې په اصطلاح له ترهګرۍ سره په جګړه کې یې له ۸۰ تر ۹۰ زره نظامیان او خلک وژل شوي.
د اسلامي امارت له واکمني د مخه د پاکستان د پوځ او خلکو د تلفاتو په اړه د دوی اعتراف
د اسلامي امارت له واکمنی مخکې په پاکستان کې غټې پېښې:
پاکستان کې د بریدونو او هلته د زیانونو مسئله هم کومه نوی پيښه نده چې د اسلامي امارت له راتګ سره دې ارتباط ولري، بلکې لا له وړاندې د پاکستان په خاوره کې لوی لوی بریدونه شوي او درانه تلفات یې اړولي، چې روښانه کوي، دا مسئله خپله د پاکستان ستونزه ده نه د اسلامي امارت.
۱- په ۲۰۰۷ اګست کې د ټي ټي پي لخوا په جنوبي وزیرستان کې ۳۰۰ پاکستانې پوځيان د عملیاتو په مهال ژوندي ونیول شول چې وروسته بیا د بیت الله محسود له څلویښتو بندې غړو سره تبادله شول.
۲ـ د ۲۰۰۸ د اګسټ په ۲۱ مه د پاکستان پنجاب کې د وسلو جوړولو فابریکې باندې حمله وشوه چې ګڼ شمیر کسان په کې ووژل شول.
۳ـ د ۲۰۰۸ د جون میاشتې په ۲ نیټه په اسلام اباد کې د ډنمارک په سفارت باندې د موټر بم برید وشو چې څو کسان په کې ووژل شول.
۴ـ د ۲۰۰۹ اکتوبر په ۲۸ مه د پیښور ښار په مینا بازار کې د موټر بم چاودنه وشوه چې ګڼ شمیر کسان په کې ووژل شول.
۵ـ د ۲۰۰۹ اکتوبر میاشت کې د سوات په شنګله سیمه بازار کې د موټر بم حمله وشوه چې تر ۴۷ تنو پورې کسان په کې ووژل شول.
۶ـ د ۲۰۱۱ د مې میاشت په ۲۲،۲۳ نیټو د کراچۍ د بحري ځواکونو(PNS Mehran) په اډه باندې برید وشو چې د راپورونو له مخې ۱۸ تنه بحري افسران په کې ووژل شول او ۱۶ تنه زخمیان شول.
۷ـ د ۲۰۱۴ دسمبر میاشتې په ۱۶ په پیښور کې د ارمي پبلک سکول(APS) واقعه رامنځته شوه چې شاوخوا ۱۵۰ تنه پکې ووژل شول او ۱۳۴ تنه زخمیان شول.
دې ته ورته ډيرې نورې پېښې او حملې هم په پاکستان کې ترسره شوي چې موږ یې فقط څو نمونې یادې کړې.
اسلامي امارت له واکمني وروسته د پخوا را مهاجر شویو قبائلو په اړه څه کړي:
• د پاکستان حکومت، پاکستاني ګوندونو، علماؤ او افغانستان ته راغلو مهاجرینو ترمنځ مو د ناستو او غونډو زمینه برابره کړې.
• اسلامي امارت هغه قبائل مهاجرین چې ډیورنډ لاین ته نیږدې سیمو کې میشت وو، او پاکستان ترې ویره لرله د هغو کورونه یې له ډيورنډ کرښې څخه مرکزي سیمو ته انتقال کړي او کمپونه ورته جوړ کړي، ترڅو ښه کنترول شي.
• له قبائلي مهاجرینو سره د وسلو ګرځول منعه شول.
• د ستونزو د حل او دوامدار مراقبت لپاره یو اصلاحي کمیسیون ایجاد شو.
• که څوک د امیر له اجازې پرته له افغانستان څخه د باندې د جهاد په نوم تلل د هغوی په وړاندې شرعي حکم او فتوا اعلان شوه.
• په پاکستان کې د سولې او امن لپاره مو د پاکستان د حکومت او ټي ټي پي ترمنځ د مستقیمو مذاکراتو لپاره زمینه مساعده کړه چې له امله یې هغه مهال اوږد مهاله اوربند وشو او خبرو اترو خورا ډير پرمختګ وکړ چې بیا د پاکستان پوځ د خاصې کړۍ لخوا هرڅه سبوتاژ شول.
اوس مهال چې کوم قبائلي مهاجرين په افغانستان کې شتون لري، دا د اسلامي امارت له راتګ څخه مخکې په افغانستان کې میشت شوي وو او لکه څرنګه چې یادونه وشوه د مهاجرت علت يې هم د پاکستان د پوځ خاصې کړۍ ناسم سیاستونه او په قبائلي سيمو کې تاوتريخوالی او عمليات وو، اسلامي امارت به د ټولو هغو هڅو او اقداماتو تود هرکلی وکړي چې په پایله کې يې دغه مهاجرين خپلو سيمو ته ستانه شي.
همدا راز د دې ټولو اقداماتو سره سره اسلامي امارت لاهم ځان مسؤل ګڼي چې له خپلې خاورې څخه چاته د بل هیواد په چارو کې د مداخلې اجازه ورنه کړي بلکه مخه یې ونیسې. ان شاءالله تعالی
