پنجشېر: د ۷.۶ میلیونه ډالرو په لګښت د پارندې ۴ مېګاواټه برېښنا تولیدي فابریکه ګټې اخیستنې ته وسپارل شوه
کابل ټکی کام (پنجشنبه، ۲۲ لړم، ۱۴۰۴ل)
د پنجشېر د پارندې اوبیزې برېښنا تولیدي فابریکه نن پنجشنبه د افغانستان اسلامي امارت لخوا ګټې اخیستنې ته وسپارل شوه.
د رياست الوزرا اقتصادي مرستیال ملا عبدالغني برادر اخوند په پرانيست غونډه کې وویل، چې د برېښنا انرژي د هېواد په پرمختګ کې لوی اهمیت لري او د اسلامي امارت په واکمنۍ کې د برېښنا د تولید پروژو بشپړونې ته ځانګړې پاملرنه شوې ده.
د پارندې فابریکه د څلور مېګاواټه برېښنا تولید ظرفیت لري او د پاکې انرژۍ یوه پیاوړې سرچینه بلل کېږي، چې له لارې به یې له ۴ زرو زیاتو پېرودونکو ته دوامداره برېښنا برابره شي.
د افغانستان برېښنا شرکت عمومي اجرائيوي رئيس ډاکټر عبدالباري عمر وویل، چې یوازې د پارندې فابریکې د بشپړاوي لپاره نږدې ۸ میلیونه ډالر لګول شوي دي.
نوموړي زیاته کړه، چې د اسلامي امارت په واکمنۍ کې د تېرو نیمه کاره برېښنا پروژو بشپړاوي ته ځانګړې پاملرنه شوې او دې اقداماتو سره به په هېواد کې برېښنايي خدمتونه په پراخه کچه ښه شي.
