ټرمپ مادورو ته د هېواد پرېښودو یوه اوونۍ مهلت ورکړ؛ د ونزوېلا هوايي حریم وتړل شو
کابل ټکی کام (سه شنبه، ۱۱ لیندۍ، ۱۴۰۴ل)
رویټرز د باوري سرچینو په حواله راپور ورکړی، چې د امریکا ولسمشر ډونالډ ټرمپ د ونزوېلا ولسمشر نیکلاس مادورو سره په تلیفوني اړیکه کې هغه ته تر راتلونکې جمعې پورې مهلت ورکړی و، څو له خپلې کورنۍ سره هېواد پرېږدي. سرچینې وایي چې د مادورو د مهلت د نهپوره کولو له امله ټرمپ د شنبې په ورځ د ونزوېلا د هوايي حریم د تړلو امر صادر کړ.
خبر زياتوي چې مادورو په دغه لنډ تماس کې د امریکا له ولسمشر څخه غوښتنه کړې وه چې د ونزوېلا له څه باندې سلو چارواکو څخه بندیزونه لېرې کړي؛ هغه کسان چې ډېری یې د واشنګټن له لوري په بېلابېلو جرمونو تورن شوي دي.
سرچینې په وينا چې مادورو د ځان او کورنۍ لپاره د امن وتلو تضمین هم غوښتی و، خو ټرمپ د هغه ډېری غوښتنې ونهمنلې.
رویټرز لیکي چې مادورو ټرمپ ته وړاندیز کړی و چې د نوو ټاکنو تر ترسره کېدو پورې دې د هغه مرستیالې دلسي رودریګز د لنډمهالي حکومت مشري په غاړه واخلي، خو دغه غوښتنه هم رد شوې ده.
د ټلیفوني اړیکې وخت شل دقیقو ته نه رسېده، خو ټرمپ مادورو ته په ډېر وضاحت ویلي چې یوازې یوه اوونۍ وخت لري چې خپل هېواد په خپله خوښه پرېږدي.
