کابل ټکی کام (دوشنبه، ۱ مرغومی، ۱۴۰۴ل)
د پاکستان په بلوچستان ایالت کې نن سهار د یوې ترافیکي پېښې له امله لږ تر لږه ۱۱ تنه افغانان مړه او ۹ نور ټپیان شوي دي.
د «ډان» ورځپاڼې د راپور له مخې، پېښه د چاغي ولسوالي اړوند د نوکندي سیمې ته څېرمه هغه مهال رامنځته شوه، چې یو پیکاپ ډوله موټر د تېلو له ټانکر سره ټکر وکړ.
راپور زیاتوي، چې په موټر کې سپاره ټول ۲۱ کسان افغانان وو او د یوه قاچاقبر په مرسته یې غوښتل په ناقانونه ډول ایران ته واوړي. روغتیايي سرچینو ویلي، چې د ټپیانو وضعیت د اندېښنې وړ نه دی.
د چاغي د پولیسو امر محمد شریف ویلي، چې د قانوني چارو تر بشپړېدو وروسته د موټر چلوونکي جسد تفتان ته لېږدول شوی او د نورو مړو شویو او ټپیانو جسدونه افغانستان ته سپارل شوي دي. نوموړي د پېښې اصلي لامل د موټر تېز رفتار بللی او ویلي یې دي، چې څېړنې روانې دي.
