کابل ټکی کام (سه شنبه، ۹ مرغومي، ۱۴۰۴ل)
د امریکا ولسمشر ډونالډ ټرمپ ګواښ کړی، که ایران د خپلو اټومي وړتیاوو د بیا رغولو هڅه وکړي، نو امریکا به له اسراییلو سره یوځای پر دې هېواد پوځي بريد ترسره کړي.
نوموړي د دوشنبې په ماښام د اسراییلو له لومړي وزیر بنیامین نتنیاهو سره په ګډ خبري کنفرانس کې وویل، سره له دې چې واشنګټن له تهران سره د خبرو پرانیستې ته چمتو دی، خو د اټومي پروګرام د بیا پیل اجازه به ورنه کړي.
ټرمپ زیاته کړه، امکان شته ایران خپل اټومي فعالیتونه په هغو ځایونو کې بیا پيل کړي چې مخکې د امریکا لهخوا نه دي بمبار شوي، خو خبرداری یې ورکړ، چې که ایران بیا د اټومي وړتیاوو د جوړولو لور ته ولاړ شي، امریکا به هر ډول ګواښ له منځه یوسي.
هغه ټینګار وکړ، چې واشنګټن به د ایران پر وړاندې قاطع اقدام وکړي او د هر احتمالي خطر مخه به ونیسي.
د امریکا ولسمشر همداراز وویل، چې د ایران ځواک او نړیوال حیثیت تر پخوا ډېر کمزوری شوی او زیاته یې کړه: «موږ به هېڅکله ایران ته اجازه ورنه کړو چې خپل اټومي توان بېرته ترلاسه کړي.» ټرمپ مخکې هم له نتنیاهو سره په لیدنه کې ویلي و، که ایران د اټومي پروګرام د بیا رغولو هڅه وکړي، نو امریکا به پرې «قاطع ګوزار» وکړي.
