کابل ټکی کام (سه شنبه، ۹ مرغومي، ۱۴۰۴ل)
د راپورونو له مخې، سعودي عربستان نن سه شنبه د یمن په مکلا بندر کې د متحده عربي اماراتو له خوا د وسلو له یوې بېړۍ بمبار کړې.
راپور وايي، دغه بېړۍ له الفجیره ښار څخه مکلا ته د وسلو د انتقال لپاره روانه وه او دوه بېړۍ یې په بشپړ ډول له منځه لاړې.
سعودي چارواکو ویلي، بېړۍ په غیرقانوني توګه وسلې او پوځي وسایط د یمن د بېلتون غوښتونکو ځواکونو د ملاتړ لپاره لېږدولې.
د سعودي له ملاتړه برخمن د یمن جلا وطنه ولسمشر رشاد العليمي په دې پېښه غبرګون وښود او اعلان یې وکړ چې د اماراتو ټول ځواکونه او مامورین باید له یمن څخه وایستل شي.
همداراز د یمن د ملي ځواکونو “د هېواد ساتنې ځواک” ته یې امر وکړ چې د حضرموت او المهرة ولایتونو په پوځي اډو کې بشپړ کنټرول ترلاسه کړي. نوموړي د اضطراري حالت اعلان هم وکړ او د ۷۲ ساعتونو لپاره یې د هوایي، ځمکني او بحري تګ راتګ بندیز ولګاوه.
سعودي عربستان د اماراتو د بې قانونه پوځي اقدام په اړه هم څرګند غبرګون وښود او ویې ویل، چې د الفجیره بندر څخه مکلا ته د وسلو بېړۍ د یمن په جګړه کې د بېلتون غوښتونکو ملاتړ کوي او د سعودي ملي امنیت ته جدي ګواښ پېښوي. سعودي چارواکو ټینګار وکړ چې دغه اقدام د ملي سرحدونو د خوندي کولو لپاره ضروري و.
