د افغانستان له لارې د ایران–چین–اروپا د رېل پټلۍ پر پراختیا خبرې وشوې
کابل ټکی کام (سه شنبه، ۹ مرغومي، ۱۴۰۴ل)
د ریاستالوزراء اقتصادي مرستیال ملا عبدالغني برادر اخوند د ایران د رېل پټلۍ ادارې د رئیس جبار علي ذاکري په مشرۍ له راغلي پلاوي سره په مرمرینه ماڼۍ کې وکتل.
دواړو لورو د افغانستان او ایران ترمنځ د اقتصادي اړیکو، سوداګرۍ او د رېل پټلۍ د پراختیا په برخه کې د همکارۍ پر پراخېدو خبرې کړي.
د ایران د رېل پټلۍ رئیس ويلي، غواړي د افغانستان له لارې د رېل پټلۍ شبکه پراخه کړي، څو له دې لارې له چین سره او د افغانستان له ستراتیژیک موقعیت څخه په ګټې اخیستنې له اروپا سره ونښلول شي.
نوموړي د دې پروژې د عملي کېدو لپاره د یوې ګډې کمېټې د جوړېدو وړاندیز وکړ.
ملا عبدالغني برادر وويل، د یادې پروژې د اقتصادي ارزښت په اړه یې درې کاله وړاندې د ایران د ولسمشر له مرستیال سره خبرې کړې وې او ټینګار یې وکړ چې ګډه کمېټه دې جوړه او عملي چارې دې هر څومره ژر چې کېږي پیل شي.
