د سوډان جګړه؛ لوړ پوړی حکومتي قوماندان وژل شوی
کابل ټکی کام (شنبه، ۲۷ مرغومي، ۱۴۰۴ل)
له سوډان ورکړل شوي راپورونه وایي، چې د البراء حکومتي قطعې یو مهم قومندان د کردفان په عملیاتو کې وژل شوی دی.
د سوېلي کردفان ایالت ځایي سرچینو خبر ورکړی، چې د البراء قطعې یو مخکښ قومندان “علي دفعالله دیدان” د کردفان د هبیلا محور د پوځي عملیاتو پر مهال وژل شوی دی.
د سرچینو په وینا، علي دفعالله دیدان د البراء په قطعه کې مهم پوځي رول درلود او همداراز د عمومي استخباراتو په چوکاټ کې یې هم مهمه څېره بلل
کېده.
دیدان د سیمې له پېژندل شویو پوځي څېرو څخه شمېرل کېده، چې له تېرو ۳ کلونو راهیسې یې د څو وسلهوالو قطعو په جوړولو او مشرتابه کې ونډه لرله. د راپورونو له مخې، هغه د «فوزي قطعې» او «متحرک الشرقیې» له بنسټګرو او قومندانانو څخه هم و.
نوموړي د خرطوم، الجزیره او د سوډان په یو شمېر نورو ایالتونو کې په بېلابېلو جګړو کې هم فعاله برخه اخیستې وه.
سرچینې زیاتوي، چې علي دفعالله دیدان د بېپیلوټه الوتکو (ډرون) په برخه کې له مخکښو متخصصینو څخه و او د پوځي عملیاتو په ترڅ کې یې د دغې ټکنالوژۍ په پراختیا او کارونه کې مهم رول لوبولی و.
دا په داسې حال کې ده، چې د سوډان په بېلابېلو سیمو، په ځانګړي ډول د کردفان کې د حکومتي پوځیانو او چټک ملاتړ ځواکونو ترمینځ لا هم نښتې دوام لري.
