کابل ټکی کام (چهارشنبه، ۱۵، سلواغه، ۱۴۰۴ل)
د اسلامي امارت د کابینې څوارلسمه غونډه، چې تېره ورځ (دوشنبه) وشوه، پکې د پراختیایي بودیجې د مصرف او د کډوالو ستونزو ته د رسېدنې په اړه مهم بحثونه وشول.
د اسلامي امارت د ویاند مرستیال، حمدالله فطرت، پر اېکسپاڼه لیکلي، په یادې غونډه کې د پراختیایي بودیجې د مصرف راپور تایید شو او اړوندو ادارو ته لارښوونه وشوه چې دغه بودیجه په پلان شویو پروژو کې پر وخت ولګوي.
نوموړي زیاته کړې، مسؤلې ادارې مکلفې شوې چې پراختیایي چارې د ټاکل شوي پلان سره سمې او په ښه توګه پر مخ یوسي، څو د هېواد د بیارغونې او پرمختګ بهیر ګړندی شي.
همداراز، په دې غونډه کې د کډوالو ستونزو ته د رسېدنې پر څرنګوالي هم بحث وشو او اړوندو ادارو ته دنده وسپارل شوه چې د کډوالو د ستونزو د حل لپاره عملي او دوامدارې لارې چارې ومومي.
د اسلامي امارت مسؤلینو ټینګار کړی، چې د پراختیایي پروژو پلي کول او د کډوالو ملاتړ د حکومت له مهمو لومړیتوبونو څخه دي او هڅه به کېږي چې په دې برخو کې لا ډېرې اسانتیاوې برابرې شي.
