وال سټریټ ژورنال: اقتصادي فشارونو او سیاسي ننګونو محمد بن سلمان د خپلو پلانونو بیا کتنې ته اړ کړی

کابل ټکی کام (پنجشنبه، ۲۳ سلواغه، ۱۴۰۴ل)

د وال سټریټ ژورنال ورځپاڼې د یوې تحلیلي مقالې له مخې، د سعودي عربستان ولیعهد محمد بن سلمان د اقتصادي فشارونو او سیمه‌ییزو امنیتي ګواښونو له امله د خپلو ځینو سترو پرمختیايي پروژو د عملي کېدو په اړه بیا کتنه کوي.

راپور وايي، د تېلو نسبي ټیټې بیې او د جګړې احتمالي خطرونه د حکومت پر مالي پلانونو اغېز کړی، او ریاض اوس د لګښتونو د کنټرول او د دولتي پورونو کمولو ته ډېر پام کړی دی.

مقاله زیاتوي چې د هېواد د «۲۰۳۰ اقتصادي بدلون» په چوکاټ کې یو شمېر مهم بدلونونه رامنځته شوي، لکه د بېکارۍ کچې راټیټېدل، د کور مالکیت زیاتوالی او د کار په بازار کې د ښځو پراخ ګډون. خو د ایران سره کړکېچ، د سیمې امنیتي وضعیت او د امریکا احتمالي پوځي اقدامات لا هم د سعودي د ستراتیژیکو پرېکړو مهم عوامل بلل کېږي، او ریاض هڅه کوي له مستقیمې جګړې ځان لرې وساتي.

د تحلیل له مخې، ولیعهد د سیمې ثبات، اقتصادي پراختیا او نړیوالو اړیکو ته لومړیتوب ورکوي، خو له اسرائیل سره د رسمي اړیکو جوړول لا هم حساسه موضوع ده.

راپور زیاتوي چې محمد بن سلمان د خپل هېواد د اقتصادي بدلون اوږدمهاله هدفونه تعقیبوي او تمه کېږي د پاچا سلمان له مړینې وروسته به واک ته ورسېږي، په داسې حال کې چې د راتلونکي ولیعهد ټاکنه به د سعودي د سیاسي راتلونکي مهم بحث وي.