چارلز فریمان خليج هېوادونو ته: د امریکا پوځي اډې په خلیج کې ستاسو د ساتنې لپاره نه، بلکې د ایران د هدف لپاره دي

کابل ټکی کام (پنجشنبه، ۱۴ کب، ۱۴۰۴ل)

په سعودي عربستان کې د امریکا پخواني سفیر چارلز فریمان، خبرداری ورکړی چې د واشنګټن او تهران ترمنځ هر ډول جګړه ممکن اوږدمهاله او ستړې کونکې وي، چې دواړه خواوې به یې له ستونزو سره مخ کړي.

هغه وویل چې پوځي فشارونه او ګامونه معمولا د ایران د اټومي پروګرام د کمښت پر ځای سرعت زیاتوي.

فریمان د خلیج شاهي حکومتونو ته په خپلو څرګندونو کې ويلي چې د امریکا پوځي اډې په حقیقت کې د دوی د خوندي ساتنې لپاره نه دي، بلکې د ایران پر وړاندې د عملیاتو لپاره اسانتیا برابروي.

هغه زیاته کړه چې په هر ډول پراخې جګړې کې خلیج هېوادونه ښايي د اقتصادي او امنیتي ستونزو سره مخ شي، په ځانګړې توګه د نفت او ګاز په صادراتو او وارداتو کې.

هغه خبرداری ورکړ چې پراخ پوځي کړکېچ به سیمه کې د انرژۍ په بازارونو کې ګډوډي رامنځته کړي او داخلي بحثونه به راپورته کړي چې د بهرنۍ پوځي شتون راتلونکی باید څنګه وي.