کابل ټکی کام (دوشنبه، ۱۸ کب، ۱۴۰۴ل)
د نړیوالو راپورونو له مخې، له ایران سره د امریکا او اسراییلو د جګړې او په منځني ختیځ کې د زیاتېدونکي تاوتریخوالي له امله د نړیوالو بازارونو پر وضعیت اغېز شوی او د خامو نفتو بیې لوړې شوې دي. راپورونه ښيي چې د نفتو د یوه بېرل بیه شاوخوا ۱۸ سلنه لوړه شوې او نږدې ۱۰۸ ډالرو ته رسېدلې ده، چې دا د ۲۰۲۲ کال د فبرورۍ راهیسې تر ټولو لوړه کچه بلل کېږي.
کارپوهان وايي د بیو د لوړېدو مهم لامل د هرمز تنګي تړل کېدل دي. دغه سمندري لاره د نړۍ د نفتو او ګازو د لېږد له مهمو مسیرونو څخه ده او د راپورونو له مخې د ایران، امریکا او اسراییلو د روانې جګړې له امله له شاوخوا لسو ورځو راهیسې د بېړیو تګ راتګ پکې سخت اغېزمن شوی دی.
بل لور ته د امریکا د انرژۍ وزیر کریس رایت ویلي چې واشنګټن د انرژۍ د کمښت تمه نه لري او نړۍ کافي د نفتو زیرمې لري.
نوموړي زیاته کړې چې امریکا هند ته اجازه ورکړې څو د روسیې نفتو پېرلو ته دوام ورکړي، څو د جنوبي اسیا د تصفیې کارخانې فعاله پاتې شي، په داسې حال کې چې د هرمز تنګي له لارې سمندري تګ راتګ په عملي ډول له خنډ سره مخ شوی دی.
