کابل ټکی کام (پنجشنبه، ۲۱ کب، ۱۴۰۴ل)
د ایران اسلامي جمهوریت د پارلمان رئیس”محمد باقر قالیباف”
ویلي، که پر ایران یرغل دوامداره شي، نو د سیمې اوبو به د یرغلګرو د وینو په رنګ سرې شي.
قالیباف په خپلو تازه څرګندونو کې ټینګار کړی، چې ایران به د هر ډول پوځي برید پر وړاندې سخت او پیاوړی غبرګون وښيي.
د هغه په وینا، د ایران وسله وال ځواکونه بشپړ چمتووالی لري او د هېواد د خاورې، خپلواکۍ او ملي ګټو د دفاع لپاره به هېڅ ډول قربانۍ څخه ډډه ونه کړي.
هغه زیاته کړې، چې د بهرنیو ځواکونو حضور او ګواښونه د سیمې د ناامنۍ لامل ګرځي او که هر څوک د ایران پر ضد تېری وکړي، نو له سختو پایلو سره به مخ شي.
د ایران د پارلمان رئیس دا څرګندونې په داسې مهال کړي چې په سیمه کې د ایران او لوېدیځ ترمنځ سیاسي او پوځي کړکېچ زیات شوی او د جګړې د دوام په اړه اندېښنې هم ډېرې شوې دي.
