کابل ټکی کام (جمعه، ۲۲ کب، ۱۴۰۴ل)
د امریکا ولسمشر ډونالډ ټرمپ یو ځل بیا له افغانستانه د امریکایي ځواکونو پر وتلو سختې نیوکې کړې او دا یې د امریکا لپاره یو لوی شرم بللی دی.
ټرمپ ویلي، چې له افغانستانه د ځواکونو وتلو د امریکا غرور په نړیواله کچه مات کړ او دغه هېواد یې له لویو شرمونو سره مخ کړ.
هغه زیاته کړې: «موږ ته دا شرم هم بس دی چې له هغه ځایه څنګه په بیړه راووتو او ډېر وسایل او امکانات مو هلته پرېښودل.»
نوموړي ټینګار کړی، چې دغه پېښه د امریکا لپاره له تر ټولو شرموونکو شیبو څخه وه او په وینا یې دې چارې ټوله امریکا د نړۍ په وړاندې وشرموله.
ټرمپ د امریکا پر پخواني ولسمشر جو بایډن هم توندې نیوکې کړې او ویلي یې دي چې د افغانستان له وتلو سره تړلي ټول شرمونه د بایډن د ناسمو پرېکړو پایله ده.
