پاکستان تحریک انصاف: کابل کې پر روغتون برید بزدلانه او د انسانیت ضد عمل دی

کابل ټکی کام (سه شنبه، ۲۶ کب، ۱۴۰۴ل)
د پاکستان د ستر او حکومت ضد سیاسي ګوند ‘تحریک انصاف’ د رسنیو دفتر مرستیال مشر “حسین احمد یوسفزی” په کابل کې د معتادینو پر یوه مرکز وروستی برید په سختو ټکو غندلی او هغه یې د انسانیت پر وړاندې ستر جرم بللی دی.
نوموړي ویلي، په دې «وحشیانه او بزدلانه» برید کې له څلورو سوو څخه زیات بې ګناه او معصوم انسانانو خپل ژوند له لاسه ورکړی دی. د هغه په وینا، دا ډول بریدونه د بهرنیو قدرتونو د خوشحالولو او د امپریالېستي اجنډاوو د پلي کولو لپاره ترسره کېږي، چې نه یوازې د افغان ولس، بلکې د سیمې د ټولو مظلومو خلکو پر وړاندې شرمناک عمل ګڼل کېږي.
یوسفزي زیاته کړې چې نه د پاکستان ولس او نه هم د پارلمان ډېری غړي خبر دي چې ولې د جګړو پر ځای د خبرو اترو او ډیپلوماسۍ لارې نه کارول کېږي. د هغه په خبره، تاریخ ښيي چې د امپریالېستي قدرتونو جګړې تل د کمزورو او بې ګناه خلکو په وینو پای ته رسېدلې دي.
هغه دا زړه بوږنوونکې پېښه په کلکو ټکو غندلې او غوښتنه یې کړې چې د دې برید عاملین دې ژر تر ژره وپېژندل شي او د عدالت منګولو ته وسپارل شي. نوموړي همداراز پوښتنه کړې چې د داسې بریدونو په ترسره کولو کې «زموږ، د امریکا او اسراییلو ترمنځ څه توپیر پاتې کېږي»، په داسې حال کې چې هغوی هم روغتونونه، تعلیمي مرکزونه او نور ملکي ځایونه په نښه کوي.
د هغه په وینا، د بې ګناه انسانانو وینه هېڅکله عبث نه ځي او مظلوم ملتونه داسې ظلمونه د تل لپاره نه هېروي.