کابل ټکی کام (سه شنبه، ۱۱ وری، ۱۴۰۵ل)
د ایران د سپاه پاسداران د قدس ځواک قومندان “جنرال اسماعیل قاآني” د یمن اسلامي مقاومت ته په یو پیغام کې د دوی د اقداماتو ستاینه کړې او د دوامدار ملاتړ ډاډ یې ورکړی دی.
نوموړي ویلي، چې د سیمې د مقاومت جبهې د امریکا او صهیونیستي رژیم پر وړاندې د مبارزې په لړ کې یو ځل بیا د ویاړ یوه نوې پاڼه پرانیستې، او ټینګار یې کړی، چې د یمن له خاورې د اتلولۍ او اخلاص نوی ځواک راڅرګند شوی دی.
قاآني د امریکا د پرمختللې الوتکې وړونکې بېړۍ «جیرالډ فورد» ته په اشارې ویلي، چې د هغې وروستی حالت او شاتګ د یمن د مقاومت د فشار پایله ده او زیاته کړې یې ده چې د دې بېړۍ د تذبذب اصلي لامل باید د یمن په غرونو او مبارکې خاورې کې ولټول شي.
هغه د یمن د رهبرۍ، قومندانانو، مجاهدینو او ولس مننه کړې او د هغوی د دقیقو پرېکړو او ستراتېژیک فکر ستاینه یې کړې ده.
قاآني همداراز ویلي، چې د یمن پر وخت حضور او د اسلامي امت، په ځانګړي ډول د غزې د مظلوم ولس ملاتړ، د سیمې د بدلونونو پر سم درک ولاړ دی او دا به د یمن د محاصرې د پای ته رسېدو لامل هم وګرځي.
هغه ټینګار کړی، چې ایران به د خپل الهي مسوولیت له مخې د سیمې له ملګرو او د مقاومت له ځواکونو سره خپل ملاتړ ته دوام ورکړي.
