کابل ټکی کام (پنجشنبه، ۲۰ وری، ۱۴۰۵ل)
د افغانستان اسلامي امارت مرستیال ویاند ملا حمدالله فطرت وايي، د وري میاشتې له ۶مې نېټې تر نن ورځې پورې په هېواد کې د بارانونو، سېلابونو، زلزلو او د غرونو د ښوېدنو له امله ۱۴۸ تنه شهیدان شوي، ۲۱۶ نور ټپیان دي او اته کسان تر اوسه لا درکه دي. نوموړي دا تلفات “له بده مرغه خورا درانه” بللي.
فطرت څرګندوي، د طبیعي پېښو په ترڅ کې ۱۸۶۲ کورونه په بشپړ ډول ویجاړ شوي او شاوخوا ۵۰۱۰ کورونو ته نسبي زیان رسېدلی دی. همدارنګه ۳۶۶ کیلومتره سړکونه تخریب شوي، د ۱۶ زره او ۷۰۰ جریبه کرنیزې ځمکې حاصلات له منځه تللي او ۴۱۳۶ مېوې لرونکې ونې نړېدلې دي.
د اسلامي امارت د څرګندونو پر بنسټ، د پسونو په ګډون ۱۸۰۱ رأسه مال تلف شوی او په ټولیز ډول ۷۵۰۴ کورنۍ زیانمنې شوې دي. چارواکي وايي د مرستو رسولو بهیر روان دی او هڅه کېږي چې له زیانمنو کورنیو سره عاجله مرستې شریکې شي.
