کابل ټکی کام (یکشنبه، ۲۳ وری، ۱۴۰۵ل)
د لیبیا د پخواني پوځي واکمن معمرالقذافي لور “عایشې قذافي” ایران ته په خطاب کې ویلي، چې د امریکا پر ژمنو باور کولو کې دې د لیبیا تجربې نه تکرار وي.
نوموړي ویلي، لیبیا د لویدیځو هېوادونو سره د باور او تفاهم لاره خپله کړه، خو بالاخره همدغه سیاست د هېواد د نظام د سقوط سبب شو.
د هغې په وینا، یوازې پر نړیوالو ژمنو تکیه کول خطرناک تمامېدلی شي او درنې پایلې لرلای شي.
هغې ټینګار کړی چې ایران باید خپلې ملي ګټو ته لومړیتوب ورکړي او په مذاکراتو کې دې له ډېر احتیاط څخه کار واخلي.
د نوموړې په خبره د لیبیا تجربه یو واضح درس دی چې بېله عملي تضمینونو پر سیاسي ژمنو باور کول ستره تېروتنه ده.
نوموړي زیاته کړې چې اوسنی نړیوال وضعیت د پخوا په پرتله ډېر پېچلی دی، نو ځکه ایران ته په کار ده چې د هر ډول پرېکړې پر مهال له ژور فکر او ستراتېژیک لید څخه کار واخلي.
