کابل ټکی کام (سه شنبه، ۱ غویی، ۱۴۰۵ل)
د افغانستان د صنعت او سوداګرۍ وزارت وایي، د افغانستان، ازبکستان او قرغیزستان د سوداګرۍ چارواکو ترمنځ د درې اړخیزې ناستې په ترڅ کې د سوداګرۍ او ټرانزیټ د اسانتیاوو پر پراختیا خبرې شوې دي.
دا ناسته د ازبکستان په کوربه توب د نړیوال صنعتي نندارتون (INNOPROM Central Asia) په څنډه کې ترسره شوې ده.
په دې غونډه کې د افغانستان د صادراتي توکو د بازار موندنې، ازبکستان او قرغیزستان ته د سوداګرۍ د پراختیا او د ټرانزیټي لارو د اسانتیاوو په اړه بحثونه شوي دي.
همدارنګه، د افغانستان په نړیوال صنعتي نندارتون کې د غړیتوب پر موضوع هم خبرې شوې دي.
د وزارت په وینا، د درې واړو هېوادونو ترمنځ د ګډ کاري ګروپ د جوړولو، د سوداګرۍ او ټرانزیټ د اسانتیاوو رامنځته کولو او د افغانستان د نړیوال نندارتون د غړیتوب په اړه هوکړه شوې ده. همدارنګه ویل شوي چې د افغانستان د صنعت او سوداګرۍ وزیر د خپل سفر په ترڅ کې د سیمې له هېوادونو سره د سوداګرۍ د پراخېدو پر اهمیت ټینګار کړی دی.
