د مالي جګړه؛ درې میاشتو لپاره حکومتي چارې پوځ ته سپارل شوي

کابل ټکی کام (سه‌شنبه، ۸ غویی، ۱۴۰۵ل)
د مالي دولتي تلویزیون خبر ورکړی، چې د هېواد په ځینو سیمو کې د حکومت ضد وسله والو د ځپلو او د نیول شویو سیمو د بېرته ترلاسه کولو لپاره د درې میاشتو لپاره واک پوځ ته سپارل شوی دی.
د راپور له مخې، د هېواد ولسمشر “اسیمي ګویتا” د پارلمان له تائید وروسته دغه پرېکړه کړې او پوځ ته یې لارښونه کړې چې د وسله والو ډلو پر ضد پراخ عملیات پیل کړي.
په ورته مهال، د مالي ولسمشر له ترکیې او روسیې غوښتي چې د امنیت په ټینګښت کې ورسره همکاري وکړي.
بلخوا، د ترکي چارواکو په حواله ویل شوي، چې د دغه هېواد ولسمشر “رجب طیب اردوغان” د مالي وضعیت له نږدې څاري او په تېرو ۴۸ ساعتونو کې د بې‌پیلوټه الوتکو له لارې پر حکومت ضد وسله والو بریدونه شوي، چې له امله یې په ځینو سیمو کې وسله وال شاتګ ته اړ شوي دي.
د مالي د پوځ ویاند “دیارا کونې” ویلي، چې د پوځ له لوري به عملیات تر هغې دوام وکړي څو د هېواد امنیت بېرته ټینګ شي او ټولې سیمې د دولت تر کنټرول لاندې راشي.
د یادونې ده، چې حکومت ضد وسله والو تر اوسه پوځ ته د واک سپارلو او د ترکیې او روسیې د احتمالي ملاتړ په اړه رسمي غبرګون نه دی ښودلی؛ خو وړاندې یې ویلي و چې د ملکي وګړو د خوندیتوب لپاره یې له ځینو سیمو شاتګ کړی، خو لا هم په مهمو ستراتیژیکو سیمو ولکه لري.