غزني اندړو کې د یوه تونس او د ملي اردو د موټرو ترمنځ ټکر، ۱۱ کسانو ته مرګ ژوبله اړولې
کابل ټکی کام ۱۶حمل/۱۳۹۵، احمدالله مهاجر
د غزني څخه خبري منابع وايي، چې د دغه ولایت د اندړو ولسوالۍ په کوټه سنګي سیمه کې د یوې ترافیکي پېښې له کبله ۱۱ کسانو ته مرګ ژوبله واوښته.
د غزني د اندړو ولسوالۍ ولسوال محمد قاسم دیسیوال رسنیو ته د دغه پېښې په تأیید کې ویلي دي، چې دغه پېښه د یوه تونس موټر او د ملي اردو د موټر تر منځ د ټکر له کبله رامنځته شوې ده، نوموړي وویل، چې د پېښې ټپيان ټول روغتون ته لېږدول شوي دي.
همدا راز د غزني ولایت د ولایتي روغتون رئیس ډاکټر بازمحمد همت رسنیو ته ویلي دي، چې دوی ته د دغه پېښې څخه وروسته یو جسد او لس ټپيان وروړل شوي دي.
ښاغلي همت وویل، وژل شوی کس په مرمیو ویشتل شوی دی.
ډاکټر همت د معلوماتو ورکولو پر مهال وویل، چې په ټپيانو کې شپږ سړي، درې ښځې او یو ماشوم دی، د ده په خوله چې په روغتیایي حالت یې ډاډمن دی.
د یادولو ده، کله چې ترافیکي پېښه رامنځته شي، نو ترافیکي پولیس یې وجه د موټر چلوونکي د رفتار تېز سرعت ښيي.
