کابل ټکی کام فرید احمد
د تمې سره سم طالبانو یو ځل بیا د تېر په څېر خپل نظامي پسرلني عملیات د هېواد په ټولو برخو کې اعلان کړل، طالبانو خپلو جنګیالیو ته توصیه کړې ده چې د افغان او بهرنیو ځواکونو په خلاف جګړه روانه وساتي. طالبان وايي چې دغه عملیات یې د خپل پخواني مشر او د دوی د خوځښت د بنسټګر مرحوم ملا محمد عمر مجاهد په نوم (عمري عملیات) اعلان کړي دي. د اعلان سره سم دهېواد له لر او بر څخه د سختو جګړو راپورونه رارسیدلي دي، چې اکثره ځایونه هدف حکومتي عسکر ګرځيدلي دي. ددغو عملیاتو د پلان په وخت زیات غوږ د ملکي تلفاتو کمیسون ته هم نیول شوی دی، او خپلو نظامیانو ته یې توصیه کړې ده چې ملکي خلک ونه کړوي، او عام المنفعه ځایونو ته زیان وانه وړي. د نظامي عملیاتو ترڅنګ طالبانو علماوو او د دعوت ارشاد کمیسون ته دنده سپارلې ده چې په مخالفو وطنوالو کار وکړي ترڅو له (کفري) صف څخه ووځي او د اسلام دښمني پرېږدي، او د خپل ملت ترڅنګ د اشغال په مقابل کې ودریږي. په اعلامیه کې راغلي دي: «عمري عملیات چي د اسلامي امارت د مشرتابه، د نظامي کمیسیون د مسئولینو او پوځي متخصصینو په ابتکار د تیرو دریو میاشتو په اوږدو کې طرح شوي زیات ترکیز په کې په دې شوی چي د الله تعالی په نصرت او فضل سره د دښمن په لاس کي د هیواد پاته سیمي هم د مجاهدینو تر کنترول لاندي راشي، دښمن په ټول هیواد کې په تهاجمي شکل تر بریدونو لاندي ونیول شي، استشهادي او نفوذي عملیات د دښمن حساسي او خوندي سیمي ولړزوي او ټول مضر چارواکي یې په چریکي بریدونو کې په نښه شي او له هرې مشروعې ممکنه وسیلې نه په استفاده به د دښمن د ځپلو او له پښو غورځولو هڅه کیږي تر څو یې خارجي ملاتړي او داخلي مزدور وسلوال په ستومانوونکې او مورال وژونکې جګړه کې را ګیر او د سیمو پریښودو ته اړ ایستل شي، په مفتوحه سیمو کې دښه امنیت په ټینګولو سره ولس ته د ښه ژوند کولو زمینه مساعده شي فوځي ماهرین حالاتو ته په کتو سره وايي چې کېدای شي سږ کال طالبان د هېواد زیاتره سیمې تر خپلې ولکې لاندې راولي ، ځکه یې دا ښودل شوې ده چې اوسنۍ دولت تر بل هر وخت کمزورۍ او په مقابل کې طالبان تر بل هر وخت قوي دي.
