اویا سلنه کندز د طالبانو په ولکه کې دی

کابل ټکی کام ۲۹حمل/۱۳۹۵، احمدالله مهاجر
د کندز ولایت اویا سلنه برخه د طالبانو په لاس کې ده.
د کندز د ولایتي شورا رئیس وایي، چې د دې ولایت اویا سلنه ځمکه د دولت د مسلحو مخالفینو په لاس کې ده.
که چیرې د دولتي ځواکونو حمایت ونه شي، نو کندز به یوځل بیا د طالبانو لاسته ولویږي.
دا په داسې حال کې چې د کندز والي اسدالله عمرخېل، امنیه قومندان او د شورا غړیو یې په ټولنیزو رسنیو کې یو لړ تصویرونه خپاره کړل، چې د کندز ښار کې په پښو ګرځي، او د کندز ښاریانو ته ډاډګیرنه ورکوي.
د کندز د ولایتي شورا مشر محمد یوسف ایوبي نن د «د کندز څنګه دفاع وکړو» ترنامه لاندې په یوه غونډه کې وویل، چې د کندز ولایت په یوه محدوده سیمه کې دولت موجود دی، مګر اکثره نقطې د دې ولایت د طالبانو په لاس کې دي.
ده وویل، دا چې په چهاردرې، دښت ارچي، خان اباد، امام صاحب، قلعه زال او د کندز ښار شاوخوا سیمو کې د دولتي ځواکونو او طالبانو ترمنځ جګړه روانه ده، سلګونه کورنیو خپل کورونه پريښي، او د مزار او کابل په لور خوځېدلي دي.
ایوبي د خپلو خبرو پر مهال وویل، چې له درې ورځو راهیسې د دغه ولایت په مختلفو نقطو کې شدیده جګړه روانه ده، چې تراوسه پورې پنځوس ملکي وګړي وژل شوي، او تر سلو زیات ټپيان دي، او سلګونه کسانو خپل کورونه پريښي.
نوموړي حکومت په دې تورن کړ، چې په کندز کې د دولتي ځواکونو حمایت نه کوي، او که چیري ژر تر ژره یې حمایت ونه کړي، نو کندز به یوځل بیا د طالبانو لاسته ولویږي.
د افغانستان د ځوانانو د مدافعینو رئیس فیض فرهمند په دغه ناسته کې وویل، چې کندز د یوې سترې فاجعې سره مخ دی، او احتمال لري، چې ډېر ژر د دولت د مخالفو وسله والو لاسته ولویږي.
ده د کندز د د سقوط په اړه وویل، که چیرې دغه ولایت سقوط وکړي، نو ټول شمال به سقوط وکړي.
نوموړي د دولت په مشرانو غږ وکړ، تر څو وسله والو مخالفین یوځل بیا د کندز نیونې ته پرېنږدي.
نوموړي وویل، ولسمشر وعده کړې وه، چې کندز به د دولت د مخالفو وسله والو څخه پاکوي، مګر په دې اړه یې هېڅ ګام نه دی اخیستی.