کابل ټکی کام ۳۰حمل/۱۳۹۵، احمدالله مهاجر
د سرپل د ولایتي شورا یو شمېر غړو او پخوانیو قومندانانو د سرپل ولایت په امنیتي وضعیت اندېښنه وښودله، او مرکزي دولت ته یې خبردارى ورکړ، که دغه ولایت ته توجه ونه کړي، نو د طالبانو په لاس به دغه ولایت سقوط وکړي.
دوی وویل، دغه ولایت ته د مرکزي دولت د نه پاملرنې له کبله یو شمېر برخې یې د طالبانو په لاس سقوط شوي دي.
د ولایتي شورا غړی محمد نور رحماني نن په یوه غونډه کې چې دولتي چارواکو هم په کې ګډون درلود، وویل، چې په سرپل ولایت کې له څو ورځو راهیسې درنده جګړه روانه ده.
«له څو ورځو راهیسې د سرپل ولایت په مرکز کې جګړه روانه ده، او د میرزاولنګ ولسوالۍ د کلیو لارې د مرکز سره تړل شوي، او خلک له څلورو ورځو راهیسې په محاصره کې دي، که مرکزي حکومت ورته جدي پاملرنه ونه کړي، او د مرستې لپاره امنیتي ځواکونه دغه ولایت ته ونه لېږي، میرزاولنګ ولسوالۍ به سقوط وکړي،.»
د سرپل ولایت د ولایتي شورا غړی محمد علي حکیمي خبردراۍ ورکړو که مرکزي حکومت په ۲۴ ساعتونو کې له لاسه وتلې سیمې بېرته خپلې نه کړي، او عملیات په کار وانه چوي، نو وروسته به پړه پر دولت او پر محلي چارواکو وي، او وروسته ملت خپل تصمیم نیسي، چې څه باید وکړي.
نوموړي د دغې پوښتنې (د خلکو وروستۍ غبرګون به څه وي؟) وویل، لومړی به محلي چارواکي تصفیه کړي، بیا به طالبان.
