بادغیس کې شپږ اربکي قومندانان د ۷۴ اربکیانو او ګڼو وسلو سره طالبانو ته تسلیم شوي

کابل ټکی کام ۰۴غويي/۱۳۹۵، احمدالله مهاجر

له بادغیس ولایت څخه خبري منابع وايي، چې د دغه ولایت په قادس ولسوالۍ کې شپږ اربکي قومندانان له ۷۴ اربکیانو او ګڼو وسلو سره طالبانو ته تسلیم شول.
طالبان وایي، چې د اربکیانو دغه لویه ډله د دوی د جلب او جذب کمیسون د هلوځلو په ترڅ کې دوی ته تسلیم شوې ده.
طالبانو د دغو شپږو قومندانانو نومونه نعیم، احمد عبدالرووف، معاون رحمت الله، داد محمد او ګل احمد یاد کړي دي.
طالبان همدا راز وایي، چې دغو اربکیانو ۳ ثقیلان، اتیا کلاشنکوفونه، ۲۵ عرادې موټرسایکلونه او نور ګڼ شمېر نظامي مهمات او مرمۍ تر دوی پورې رسولي دي.
د یادولو ده، چې په تېرو دوو اونیو کې د دغه ولایت په سنګ اتش او آب کمري ولسوالیو کې هم تر څلوېښتو زیات پولیس او اربکیان طالبانو ته له ګڼو وسلو سره تسلیم شوي دي.