ایوبي: «د ملي یووالي حکومت ستونزې زېږوي»

کابل ټکی کام ۰۵غويي/۱۳۹۵، احمدالله مهاجر
په ولسي جرګه کې د کندهار د خلکو وکیل عبدالرحیم ایوبي ویلي دي، چې د ملي یووالي حکومت ستونزې زېږوي.
د کندهار د خلکو استازي عبدالرحیم ایوبي نن په خوست کې یوې ولسي غونډې ته د وینا پر مهال وویل، چې د ملي یووالي حکومت هېڅ مشروعیت نه لري.
ده پر ولسمشر نیوکه وکړه، چې د هېواد چارې نه شي سمبالولی، او د ده وروستۍ پرېکړه یې چې له وسله والو مخالفینو سره به جګړه کوي، وغندله، او زیاته یې کړه، چې حکومت تراوسه د جګړې په ډګر کې نه دی بریالی شوی، نو له دې وروسته به څنګه وکولاى شي، چې جګړه وګټي.
ایوبي دغې غونډې ته چې سلګونو کسانو پکې ګډون درلود، وویل، چې د ملي یووالي حکومت د امریکا په سفارت کې د بهرنیانو په فرمایش جوړ شوی.
«د ملي یووالي حکوت د امریکا په سفارت کې د بهرنیانو په فرمایش جوړ شوی دی، او باید لویه جرګه راوغوښتل شي، تر څو د افغانستان اوسني بحران ته د پای ټکی کېږدي.»
عبدالرحیم ایوبي همدا راز له ملي یووالي حکومت څخه پرده پورته کړه، چې دغه حکومت د اساسي قانون د ماتې په موخه جوړ شوی دی، چې له کبله یې د دغه حکومت چارواکي د ښې حکومتدارۍ پر ځای غلاوې، چور او فساد کې مهم رول لري.
ایوبي وویل، د دغه حکومت د چارواکو د غلا او چور له کبله افغانستان مخ په ځوړند روان دی.
ښاغلي ایوبي د ولسي جرګې له وکیلانو څخه پرده پورته کړه، چې دوی د رایو ورکولو پر مهال له وزیرانو زرګونه پیسې اخلي، او له وزیرانو څخه شخصي ګټې ترلاسه کوي.