کابل ټکی کام ۱۹غويي/۱۳۹۵، هلال خاورې
د خبري رسنیو د خبر له مخې چې د پاکستان هېواد په کراچۍ ښار کې نا پېژانده وسله والو د مدني ټولنې یو مخکښ فعال خرم ذکي د ډزو په مټ وژلی دی.
ځايي پولیسو رسنیو ته ویلي دي، خرم ذکي د نارت ناظم اباد سیمې په سکټر ۱۱م کې په یوه هوټل کې ناست وو، او دوو موټرسایکل سپرو پرې ډزې وکړې.
پولیس وايي، خرم ذکي د پېښې په ځای کې خپله ساه ورکړې ده، او له ده سره یو خبریال او بل لاروی ټپیان شوي دي، چې د خبریال روغتیايي حالت نازک دی.
خرم ذکي د (اېل یو بي پي) په نوم بلاګ ايډېټر او د ټولنیزو اړیکو په وېب پاڼو کې ډېر فعال وو، ډېری شکایتونه به یې هم د ټولنیزو رسنیو له لارې کول.
تراوسه پورې د دغې پېښې پړه چا نه ده منلې، خو پولیس وايي، چې پلټنې یې شروع کړي دي.
د یادولو ده، تېر کال (۲۰۱۵میلادي) کې هم په کراچۍ کې د مدنې ټولنې یوه فعاله سبین محمود د ډزو په مټ وژل شوې وه.
