عمر ځواک: دهلمند د امنیت امر په چاودنه کې ټپي شوی
کابل ټکی کام ۱۳۹۵ غبرګولی ۱۳ عبدالهادي همت
د هلمند د والي ویاند عمر ځواک رسنیو ته وويل، چې په دې پېښه کې درې نور پوليس هم ټپیان شوي دي.
مل پاسوال جیلاني خروټی د لښکرګاه – مارجې ترمنځ د لويې لاري د خلاصون په عملیاتو بوخت وو چې نن څه باندې لس بجې يې موټر د سړک د غاړې پر ماین وربرابر شو او د نوموړي په ګډون څلور پولیس په کې ټپیان شول.
مل پاسوال جیلاني خروټی تازه د هلمند د امنیت د امر په توګه ټاکل شوی وو
طالبانو له نږدې یوې اونۍ راهیسې د هلمند ولایت په څو ولسوالیو کې د افغان ځواکونو پر پوستو عملیات پیل کړي دي.
د یادونې وړ ده چې له څو ورځو راهیسې هلمند د سختو جګړو شاهد دی او نوموړی د امنیت امر تر ټولو لوړ پوړی نظامي منصبدار دی، چې د هلمند په تازه جګړو کې ټپي شوی دی .
د افغانستان د دفاع وزارت ویاند جنرال دولت وزیري نن په کابل کې خبریالانو ته وویل چې، طالبانو د کندز ولایت د جګړو په څیر په هلمند ولایت کې هم په یو وار په څو ولسوالیو کې د افغان امنیتي ځواکونو په مرکزونو عملیات شروع کړي او ده دا هم ومنله چې ((په هلمند کې جګړه سخته ده)).
