کابل ټکی کام ۲۱غبرګولي/۱۳۹۵، سمسور ګیلاني
د امریکا د دفاع وزارت (پڼټاګون) یوه لوړپوړي چارواکي رسنیو ته د نوم د نه ښودلو په شرط ویلي دي، چې ولسمشر بارک اوباما ښايي له افغان پوځ سره د طالبانو په نښه کولو کې د امریکایي ځواکونو د ملاتړ لمن نوره هم پراخه کړي.
ده وویل، چې د دغې پرېکړې له مخې به امریکايي پوځ ته د هوايي ځواک په کارولو کې اجازه ورکړل شي، او له افغان ځواکونو سره به نږدې هوایي ملاتړ ډېر شي.
دغه لوړپوړي چارواکي همدا راز ویلي دي، چې په افغانستان کې اوس هم لس زره امریکایي ځواکونه دېره دي، خو هغوی په مخامخ جګړو کې برخه نه اخلي.
اوباما دغه پرېکړه داسې مهال کوي، چې د طالبانو د مشر ملا اختر محمد منصور اخوند له وژل کېدو وروسته د طالبانو بریدونه ډېر شوي دي، او د افغان ځواکونو پر خلاف یې بې سارې پرمختګونه کړي دي.
