ليکوال : م، نجم الرحمن (فضلي)
د ام الکتاب او لوح محفوظ حقيقت
پوښتنه : ام الکتاب او لوح محفوظ دوه جلا جلا کتابونه دي او که دواړه د يوه کتاب نوم دى؟ که چيرته دواړه جلا جلا وي نو په دواړو کې فرق (توپير) څه دى؟ دا په کومه ژبه کې ليکل شوي او کاتب (ليکونکى) يې څوک دى؟.
ځواب : ام الکتاب لوح محفوظ ته ويل کيږي، ژبه يې الله تعالى جل جلاله ته معلومه ده او کاتب يې د الله تعالى په اذن قلم وه ([1]).
د الله د نام اهانت کول کفر دى
پوښتنه : د خداى تعالى جل جلاله د نامه بې عزتي کولو حکم څه دى؟.
ځواب : د خداى تعالى جل جلاله د نامه اهانت کول کفر دى ([2]).
الله تعالى په خپل مخلوق کې کوم مخلوق ته د عبادت کولو حکم کړى
پوښتنه : الله تعالی په خپل مخلوق کې کوم کوم مخلوق ته د عبادت کولو حکم کړی؟
ځواب : انسانانو او پيريانو ته يې د عبادت کولو حکم کړی، دغو دواړو ته مکلف ويل شوي، فرښتې او د دنيا نور روح لرونکي شيان په عبادت مکلف نه دي ([3]).
مسلمان په هر حال کې له کافرانو څخه بهتر دى
پوښتنه : آيا مسلمان په هر حال کې له کافرانو څخه بهتر دى؟.
ځواب : هو ! مسلمان په هر حال کې له کافرانو څخه بهتر دى، او کافر په هيڅ حال کې له مسلمانانو څخه ښه کيدلاى نشي ([4]).
کائنات په څو ورځو کې پيدا شوي
پوښتنه : يو شمير خلک وايي چې الله تعالى په شپږو ورځو کې دنيا جوړه کړې او په اومه ورځ يې آرام کولو، مګر يو شمير نور خلک بيا دا خبره نه مني، ځکه چې الله تعالى آرام کولو ته ضرورت نلري، نو که دا بيان کړى شي چې الله تعالى جل جلاله دنيا په څومره موده کې جوړه کړې؟.
ځواب : په شپږو ورځو کې د دنيا پيدا کول دا خبره صحي ده، او په اومه ورځ آرام کول دا د يهوديانو ټوقې دي ([5]).
د عالم دين اهانت کول کفر دى
پوښتنه : د يوه عالم د اهانت او بې عزتي کولو شرعي حکم څه دى؟.
ځواب : د يوه عالم له دې امله چې هغه يو ديني عالم دى د هغه اهانت او بې عزتي کول موجب د کفر دي، او که چيرته يې اهانت او بې عزتي کول له همدې امله نه وو، بلکې د کوم بل دنيوي معامله له امله وو نو بيا موجب د کفر نه دى ([6]).
پيريان څوک دي
پوښتنه : پيريان څوک دي؟
ځواب : پيريان هم د خدای تعالی يو لوی مخلوق دی کوم چې له اور څخه پيدا شوي، د پيريانو جسم دومره لطيف دی چې مونږ ته په نظر نه راځي، ليکن کله چې هغه د کوم انسان يا کوم ځناور په شکل کې شي بيا تر سترګو کيږي، د خپل شکل بدلولو، د انسانانو او ځناورانو په صورت کې د کيدلو طاقت الله تعالی هغوی ته ورکړی، په هغوی کې نران او ښځې هم شته دي، د هغوی اولاد هم شته ([7]).
کفر څه شی دى
مسئله : په کومو شيانو باندې چې ايمان راوړل ضروري دي، په هغو کې د يوې خبرې نه منل هم کفر دى، د بيلګې په توګه يو کس دى چې الله تعالى جل جلاله نه مني، يا د الله تعالى جل جلاله له صفاتو څخه انکار کوي، يا دوه او درى خدايان مني، يا له فرښتو څخه انکار کوي، يا د الله تعالى جل جلاله په کتابونو کې له کوم کتاب څخه انکار کوي، يا کوم پيغمبر نه مني، يا له تقدير څخه منکر وي، يا د قيامت ورځ نه مني، يا د الله تعالى جل جلاله په قطعي احکامو کې له کوم حکم څخه انکار کوي، نو په همدغو ټولو صورتونو کې کافر کيږي ([8]).
([1]) آپکى مسايل اور انکا حل، ١ : ٦٠، بحواله : شرح فقه الاکبر، ص : ٤٩.
([2]) کفايت المفتي، ١ : ٤٧، بحواله : بزازيه علي هامش هنديه، ج : ٦، ص : ٣٢٣.
([3]) تعليم الاسلام، څلورمه برخه، ص : ١٧.
([4]) کفايت المفتي، ١ : ٥٥، بحواله : تنوير مع شرحه، ج : ٤، ص : ٢٢٩.
([5]) آپکى مسايل اور انکا حل، ١ : ٦٢، بحواله : الاعراف، آيت : ٥٤، سورة (ق)، آيت : ٣٨، ابن کثير، ج : ٥، ص : ٦٨٢، تفسير النسفي، ج : ٣، ص : ٣٦٩.
([6]) کفايت المفتي، ١ : ٥٦، بحواله : بزازيه علي هامش هنديه، ج : ٢، ص: ٣٣٦.
([7]) تعليم الاسلام، څلورمه برخه، ص : ١٧.
([8]) مسايل رفعت قاسمي، ٦ : ١٥، بحواله : تعليم الاسلام، ج : ٤، ص : ١٨.
