حسان مجاهد
اعتکاف د رمضان په ټوله میاشت کې غوره عمل دی خو د رمضان په وروستۍ لسيزه کې د مؤمن لپاره یو غوره فرصت دی؛ ځکه په يوه لسيزه کې داسي څه ترلاسه کولای شي، چې په کلونو کلونو يې نه شي ترلاسه کولای. د اعتکاف له زیات شمېر ګټو څخه یو شمېر ګټې په لاندي توګه بیانیږي.
*١_ له الله تعالی سره د بنده مينه او تعلق پيدا کيدل*
بنده چې له الله تعالی سره مينه او تعلق غواړي، نو لومړی به هغه څه له منځه وړي، چې د بنده او الله تعالی تر منځ تعلق له منځه وړي، چې هغه موانع ډير خوراک، ډير څښاك، ډېر خوب او له خلګو سره ډیري خبرې او ګډون کول دي؛ الله تعالی بنده ته د روژې نیولو امر وکړ، ترڅو له ډير خوراک او څښاک څخه وساتل شي او اعتکاف يې بیا ځکه روا کړ؛ تر څو بنده له خلګو سره ډیري خبرې او تعلقات پریږدي، د بندګانو په بدل کې له الله تعالی سره يې محبت پيدا شي او د الله تعالی ملګرتیا د قبر په هغه دهشتناک وخت کې ګټه ورته ورسوي چې يوازي پروت وي او بل هيڅ ملګری نه لري.
*٢_د ليلة القدر شپې ته انتظار کول*
د پخوانیو امتونو عمرونه دراز وو خو د عمل ثواب يې کم وو او د محمدي امت بیا عمرونه ډير کوتاه دي، خو الله تعالی په ژوند کې داسي قیمتي وختونه ور باندي لورولي دي چې په کم عمل د زرګونو کلونو ثواب ترلاسه کیږي، د رمضان په وروستۍ لسيزه کې يوه داسي شپه ده چې عبادت يې تر زرو میاشتو غوره ده او الله تعالی له بندګانو څخه ځکه پټه کړې ده چې دوی یې د ترلاسه کولو لپاره لس شپې سبا کړي او قدر يې ورته معلوم شي او ددغه لسو شپو په سبا کولو ليلة القدر ته انتظار کول، د اعتکاف له اساسي ګټو او اهدافو څخه دی.
*٣_ د بخښنې امید کول*
که په دنیا کې مجرم د يو چا دربار ته ور شي، په چيغو چيغو او فرياد ترې بخښنه غواړي او تر بخښنې وړاندي کډه نه اخلي؛ خامخا به بخښل کیږي، دا شان معتکف هم د الله تعالی دربار(مسجد) ته راشي، هلته د يو زنداني په شان زارۍ او فريادونه کوي او له الله تعالی څخه د ګناهونو بخښنه غواړي، امید شته چې وبخښل شي.
*٤_ له خلګو يوازيتوب*
معتکف له خلګو يوازي وي او سلف صالحينو به خپلو اتباعو ته ددې سپارښتنه کوله، چې یو څه وخت له خلګو يوازي توب کوئ، د آخرت فکر کوئ او له ځانه سره محاسبه کوئ. عمر فاروق رض به ويل: تاسو خامخا لږ وخت يوازيتوب ته ځانګړی کړئ! مسروق رح به ويل: انسان باید داسي وخت ولري چې خپل ګناهونه ور ياد کړي او مغفرت وغواړي. إبن جوزي رح به ويل: که له رب سره يوازي شې، د هغه معرفت به ترلاسه کړې!
*٥_ له بدو کړنو کرکه*
د اعتکاف بله ګټه داده چې له ناوړه کړنو، حرکاتو، عاداتو کرکه پيدا شي، ډير وخت یو څوک په ځان کې ناوړه عادات لري او یا د مواد مخدره وو روږدی وي، خو کله چې په اعتکاف کې له دغو شیانو ځان وساتي؛ وروسته یې ټول عمر ترې کرکه پيدا شي.
*٦_ په غوره اعمالو همیشتوب*
معتکف چې کوم نيک اعمال لکه ذکر، تلاوت، صلاة تهجد، فکر، محاسبه او مراقبه تر سره کوي، ډېر وخت له اعتکاف وروسته هم الله تعالی په دغه غوره اعمالو د همیشتوب توفیق ورکړي.
*٧_ اخلاص پيدا کيدل*
هيڅ يو عمل الله تعالی ته تر هغه نه ده قبول، تر څو چې اخلاص پکې نه وي، د اعتکاف له ګټو دا هم ده چې کله زړه له الله تعالی سره وتړل شي، بیا نو د بنده په اعمالو کې اخلاص پيدا شي او هر قول، فعل، حرکت او سکون يې د الله تعالی لپاره شي.
*٨_ د زړه صفایی*
رسول الله ﷺ فرمايي: خبردار! په بدن کې يوه ټوټه غوښه ده، چې په اصلاح يې ټول بدن اصلاح کیږي او په فساد يې ټول بدن خرابيږي او هغه ټوټه زړه ده! کله چې معتکف له عبادت سره اشنا شي او له ګناهونو ځان وژغوري زړه یې صفا کیږي او د زړه صفايي په اعتکاف کې تر ډېره حده امکان لري.
نو ای مؤمنه وروره! د رمضان دوه لسيزي په ختمیدو دي او يوه قیمتي لسيزه لا درته پاته ده، نو پاڅه د اعتکاف اراده وکړه، لس شپې له مخلوقه وه خالق ته کډه بار کړه او د آخرت توښه برابره کړه؛ ځکه خدای خبر چې را روان کال به ژوندی او که تر تورو خاورو لاندي يې!
