مېتیو هو: د اوباما وروستۍ پرېکړه د هغه ستره تېروتنه ده
کابل ټکی کام۱۳۹۵ غبرګولی۲۵ زرغون خوږیاڼی
میتیو هو چې په افغانستان کې د متحده ایالاتو پخوانی لوړ پوړي دیپلومات وو ویلي دي، چې د امریکايي ځواکونو د صلاحیتونو د ډېرېدو په اړه د اوباما وروستۍ پرېکړه د هغه ستره تېروتنه ده او په دې سره به په افغانستان کې د ملکي تلفاتو شمېر نور هم زیات شي.
د مېتیو په باور ولسمشر بارک اوباما د افغانستان جګړې په پایته رسولو کې ناکام دی او هڅه کوي، چې دغه لوی مسؤلیت د امریکا راتلونکي ولسمشر ته پرېږدي. هغه د اوباما دغه اقدام ستره تېروتنه بللې ده.
هغه زیاتوي، چې په تېر ۲۰۱۵ م کال کې د جګړو له کبله افغانستان کې ۳۵۴۵ بې ګناه افغانان وژل شوي، ۷۴۵۷ نور ټپیان شوي، چې په روان کال کې امریکايي ځواکونو ته د هوايي بریدونو د صلاحیتونو په ډېرېدو سره به دا کچه تر دې هم ډېره شي.
مېتیو هو په ۲۰۰۹ م کال یې په افغانستان کې د جګړې د دوام په غبرګون له خپلې دندې استعفا وکړه.
دا په داسې حال کې ده، چې وړمه ورځ دولتي ځواکونو په فراه ولایت کې هغه مهال بمبار کړی، چې ځايي خلک د یوې جنازې لپاره راغونډ شوي وو، په دغه بمبارۍ کې د درې ښځو او دوه ماشومانو په شمول پنځه ملکي وګړي وژل شوي او تر ۳۰ زیات ټپیان دي چې اکثر یې ښځې او ماشومان دي.
