په تير پسې…..
آمرانو او وزیرانو د شهزاده ټيپو نه وغوښتل چې ورته دمیسور د سلطنت د تاج د په سرولو لپاره د یوه ستر جشن د جوړولو اجازه ورکړي. ترڅو په سرنګاپټم کې هم همغسې په زړه پورې جشن جوړ کړل شي لکه د ډهلي پادشاهانو چې د تاج د په سرولو په وختونو کې خپلو پادشاهانو ته جوړاوه. خو شهزاده ټیپو د داسې جشن د جوړولو اجازه ورنکړه .
شهزاده د خپلو کسانو سره سرنګاپټم ته د لمر د لویدو سره سم را ننوت. په دې اساس پریکړه وشوه چې د هغه د تاج د په سرولو مراسم دې سهار تر سره کړل شي.
پدې شپه شهزاده خپل خاص خاص آمران د شپې ډوډۍ ته را بللي وو. پدې میلمستیا کې محمدعلي کمیدان او مها میرزاخان په ځانګړي توګه را بلل شوي وو .
د ډوډۍ خوړلو په وخت کې شهزاده د مها میرزا خان په لور مخ کړ او ترې ویې پوښتل:
«میرزا خانه! ما داسې احساس کړه چې زما داستقبال لپاره یو شمیر امیران او وزیران نه و راغلي، آیا ددي خبرې وضاحت کولی شې؟
د میرزاخان په لاس کې د ډوډۍ ټوټه وه. لاس یې چیرې چې وو هملته ودرید، هغه د ځواب په لټه کې وو چې محمدعلي کمیدان د شهزاده ټیپو په لور مخ کړ او دهغه توجه یې ځانته را واړوله.
درنه شهزاده! د دې خبرې ځواب به زه درته ووایم:
شهزاده په ډیره حیرانونکي توګه هغه ته وکتل:
«درنه شهزاده!» محمدعلي کمیدان، پداسې حال کې چې خپل ځان یې سنبال کړ، وویل: «په حقیقت کې د میرصادق علي خوی بوی دهمغه لمړۍ ورځې څخه خراب دی. دا سړی د جناب محمدعلی نازولی ملګری وو او هغه ته به یې د شرابو او کبابو محفلونه جوړول. دلته سرنګاپټم ته په راتلو یې خوی بوی نور هم پسې خراب شوی دی»
شهزاده د لاس په خوځولو سره د محمدعلي کمیدان خبره غوڅه کړه.
«درنه سرداره! ته ډیر ستر فوځي سالار یې. په دې خاطر ته باید د جنګ په ډګر کې جنګي حکمتونو ته ډیره توجه وکړې. که چیرې د کوم امیر خوی بوی خراب شوی وي نو مسؤلیت یې د ښار کوټوال او قاضي ته راجع کیږي، ته ولې په داسې مسایلو کې خپل ځان ور غورځوې؟
که څه هم محمدعلي کمیدان د شهزاده احترام او درنښت په خپل ځای و ساته خو د ځواب ورکولو په وخت کې یې په ژبه کې لږ څه تریخوالی راغی.« درنه شهزاده! په میرصادق باندي دا شک کیږي چې د شهزاده کریم د تخت د کینولو کوم پلان چې هغه جوړ کړی وو په هغې کې هغه مخلص نه وو بلکه بد نیته وو. دهمدې شک په بنسټ ما هغه په خپله حویلۍ کې بندي کړی دی»
درنه سرداره! دا تا څه کړي دي؟» په دې وخت کې د شهزاده آواز کې تیز والی راغی «آیا له تاسره د میرصادق د بد نیتۍ په اړه کوم ثبوت شته؟ که چیرې وي نو را وړاندې یې کړه ؟
« درنه شهزاده! ثبوت به ډېر ژر درته برابر کړم . محمدعلي کمیدان د شهزاده د نا خوالۍ کومه پروا ونکړه او په ډېر ډاډ سره یې ځواب ورکړ«په میرصادق باندې دا شک هم کیږي چې هغه ستا دلته سرنګاپټم ته د راتلو په وخت کې تاته د زیان رسولو پلان هم جوړ کړی وو. خو ما هغه او دهغه ملګری دهغوی په حویلیو کې بندیان کړل تر څو ستاسو د استقبال په وخت کې کومه ناخواله را منځته نکړي.»
« درنه سرداره! دا خو تا نور هم ظلم کړی دی» پدې وخت کې شهزاده ډیر په غصه شو «تاته معلومه ده چې خدای بخښلي پلار مې د ارکات د ولکه کولو وروسته میرصادق د ټول میسور د مالیاتو افسر ټاکلی وو؟ آیا دهغه په خلاف د غبن، فساد او یا بد نیتۍ کومه پیښه مخته راغلې ده ؟ »
نور بیا…..
