پاکستان د افغان کډوالو موده شپږ میاشتې نوره وغځوله

کابل ټکی کام ۱۳۹۵ چنګاښ ۱۰ زرغون خوږیاڼی

په اسلام اباد کې د کډوالو چارو کې د ملګرو ملتونو عالي کمیشنرۍ رسنیو ته ویلي، چې د پاکستان حکومت په دغه هیواد کې د مېشتو افغان کډوالو د اوسېدو نېټه شپږ میاشتې نوره غځولې.

د پاکستان لومړي وزیر نواز شریف دفتر هم اعلان کړی، چې افغان کډوال به د دې کال تر پایه(د روان میلادي کال د ډسمبر میاشتې په ۳۱مه) پورې پاکستان کې پاتې شي.

نن پجشنبه (جون ۳۰مه) په دغه هیواد کې د افغان کډوالو د اوسېدو قانوني نېټه پایته ورسېده، چې اوس پاکستاني چارواکو نور شپږ میاشتې وخت ورکړ.

شاوخوا یو نیم ملیون افغان کډوال په پاکستان کې د دې هېواد د کورنیو چارو وزارت له لورې د اوسېدو قانوني اسناد لري.

د پاکستان حکومت ویلي، چې دا به د افغان کډوالو په پاتې کېدو کې وروستی زیاتوالی وي او د راتلونکي میلادي کال له پیل وروسته به د کډوال د بېرته تلو بهیر پیل شي.

همدارنگه پاکستاني چارواکو ویلي، چې پاکستان به له بېرته تلونکو افغان کډوالو سره په افغانستان تر پنځو کلو پورې د غنمو مرسته کوي.

په راپور کې راغلي، چې پاکستان به له هر ستنیدونکي افغان کډوال سره ۴۰۰ ډالر مرسته وکړي.

د یادونې وړ ده، چې له څو ورځو راهیسې په پاکستان میشت افغان کډوال د ځایي پلیسو لخوا خورا زیات ځورول کیږي، چې تر ۲۰۰۰ زیات افغانان یې زندانونو کې اچولي، پرون د وقت اردو تلویزیو خبر وکړ، چې په پاکستاني زندانونو کې نور ځای نشته!.

عمران خان د افغان سفیر سره وعده وکړه، چې پولیسو ته به امر وکړي تر څو افغانان ونه ځوروي.