کابل ټکی کام ۱۳۹۵ چنګاښ ۱۱ زرغون خوږیاڼی
سعودي عربستان به سږ کال د حج د فریضي د ادا کولو د مراسمو له پاره دغه هېواد ته ورتلونکیو حاجي صاحبانو ته برښنايي لاسبندونه ورکوي، چې پر مړوند به تړل کېږي.
سعودي دا ګام وروسته له هغه پورته کوي، چې تیر کال د حج په مراسمو کې د ټېل ماټېل او ګډوډیو له امله نږدې اووه سوه پنځوس کسان ووژل شول او تر نهه سوه زیات نور ټپیان شول.
د سعودي دولتي خبري آژانس په رپوت کې ویل شوي، چې په دغو لاسبندونو کې به د حاجي صاحبانو شخصي او طبي معلومات خوندي کېږي او له مسوولیونو سره به یې په پېژندلو کې مرسته وکړي.
دغه راز د حرم شریف په شاوخوا کې زر نوې انځوریزې کمرې ځای پر ځای شوي، چې له لارې به یې اروایې حالت او د حاجیانو تګ راتګ څارل کیږي.
په لاسبندونو کې به د حاجي صاحبانو د پاسپورت شمېرې او دغه راز نور مهم معلومات ثبت شوي، خو د دې تر څنګ به په کې د لمانځه وختونه هم ښودل کیږي.
دا لاسبندونه له هغه چا لپاره هم ډېر مهم دی، چې په عربي ژبه نه پوهیږي، ددوی لپاره به په یاد لاسبند کې مهم معلومات هم ځای په ځای کیږي.
