کابل ټکی کام ۱۲چنګاښ/۱۳۹۵، احمدالله مهاجر
ولسي جرګې نن خپله ناسته د کابل د تېرې پنجشبنې ورځې د برید په اړه ځانګړې کړې وه، او د دغه برید په تړاو یې خبرې اترې وکړې.
په دغه نننۍ ناسته کې افغان امنیتي چارواکي پر دې تورن کړی شول، چې دوی په خپلو دندو کې ناغیړي کوي.
په ناسته کې وویل شول، چې د امنیتي چارواکو له لورې په ډله ییزه توګه په بسونو کې د پولیسو لېږدول، او استخباراتي معلوماتو بابیزه ګڼل د افغان افسرانو او پولیسو ژوند له ګواښ سره مخ کړی دی.
په ناسته کې یو شمېر وکیلانو وویل، چې له برید وړاندې دا ډول استخباراتي معلومات هم ترلاسه شوي وو، چې ښايي پر لېږدوونکو پولیسو او افسرانو برید وشي، خو دغه معلومات د چارواکو له خوا بابیزه ګڼل شوي وو.
ځینو وکیلانو د امنیتي چارواکو استیضاح کول بې ګټې وبلل، او د دې په اړه یې نېغ په نېغه له ولسمشر سره پر خبرو ټینګار وکړ.
تېره پنجشنبه د کابل په لویدیځ کې د افغان افسرانو پر يو کاروان سرتېری برید وشو، چې د میدان وردګو د روزنې له یوه مرکز څخه کابل ته راروان وو.
د دغه برید پړه طالبانو پر غاړه واخیستله، لږ تر لږه پکې ۳۲ افسران ووژل شول، او شاوخوا ۸۰ نور ټپیان شول.
په دې وروستیو کې په پلازمینه کابل او نورو سیمو کې د افغان ځواکونو پر کاروانونو او پر مهمو مرکزونو د طالبانو له خوا سرتیري بریدونه زیات شوي دي.
د یادولو ده، وړاندې هم طالبانو د پولیسو، ملي اردو، قاضیانو، څارنوالانو او نورو دولتي مامورینو پر ګاډو باندې مرګوني بریدونه کړي.
