کابل ټکی کام ۲۰چنګاښ/۱۳۹۵، احمدالله مهاجر
پولنډ: په وارسا غونډه کې د اشرف غني څرګندونو ته پاکستان توند غبرګون ښودلی دی، او ویلي یې دي، چې دا ډول څرګندونې د دوی د خفګان لامل ګرځي.
ولسمشر غني د شنبې په ورځ د وارسا په غونډه کې د خبرو پر مهال پر پاکستان انتقاد وکړ، او ویې ویل، چې پاکستان دا مهال هم په وسله والو کې ښو او بدو ته نظر کوي.
د پاکستان د بهرنیو چارو وزارت د ولسمشر غني د دغو څرګندونو په غبرګون کې ویلي دي، چې اسلام اباد د دا ډول څرګندونو له کبله خفه شوی دی.
د پاکستان د بهرنیو چارو وزیر ویاند محمد نفیس ذکریا رسنیو ته وویل، اوس داسې وخت را رسېدلی دی، چې پاکستان او افغانستان باید پر یو بل تهمتونه ونه تړي، باید له یو بل سره د همکاریو زمینه مساعده کړي.
دا په داسې حال کې چې افغانستان هر وخت له پاکستان څخه د وسله والو د ځپلو غوښتنه کوي، مګر پاکستان یې ردوي.
