کابل ټکی کام ۲۶چنګاښ/۱۳۹۵، سمسور ګیلاني
د فرانسې د لارۍ برید په اړه د کابل ټکي کام یوه همکار ځانګړی معلوماتي راپور برابر کړی دی، چې له نړیوالو غربي رسنیو څخه یې ژباړلی.
د فرانسې په سوېلي ښار نیس کې هغه مهال یوه لارۍ چلوونکي خلک لاندې کړل، او دپاسه یې پرې خپله لارۍ وچلوله، چې زرګونو راټول شویو د انقلاب کلیزې د ملي ورځې مراسم لمانځل.
که څه هم دغه لارۍ د لوړ اواز سره سره په ډېر تېز سرعت پر خلکو ورغله، خو د اور لوبې نندارې چې درنه ګڼه ګوڼه یې جوړه کړې وه، د خلکو پام بالکل د لارۍ اواز کش نه کړ، او دوی به لارۍ هغه مهال ترسترګو کېده، چې کله به دومره ورته نږدې شوه چې نور خلاصۍ ترې نه شواي کېدای.
پېښه په ځايي وخت د شپې په ۱۰:۳۵ بجو رامنځته شوه.
چارواکو هم دا منلې چې، لارۍ تر دوو کیلو مترو پورې پر خلکو چلول شوې وه.
په دغه برید کې ۸۴ کسان وژل شوي دي، او لسګونه نور ټپيان شوي دي.
په وژل شویو کسانو کې، یو اوکراینۍ، یو روسۍ او دوه امریکایي وګړي پېژندل شوي دي، او یو برېتانیۍ وګړی ټپي شوی دی.
سي ان ان ټلویزیون ویلي دي، چې په دغه پېښه کې د امریکا د مشهور بیسبال روزونکي شان کلارک د خپل ۱۱ کلن زوی برودي سره یو ځای وژل شوي دي.
په ټولنیزو رسنیو کې د پېښې خپرې شوې ویډیوګانې او انځورونه ښيي، چې بې شمېره کسان پر سړکونو پراته دي، لارۍ چلوونکي د لارۍ له منځ څخه پر خلکو ډزې کوي، او څوک هم نشته چې مخه یې ډب کړي.
پولیس وايي، بریدګر یې هغه مهال له منځه یووړو، چې پرخلکو یې ډزې کولې، او زیاته کړې یې ده، چې د پېښې له ټولو اړخونو څخه دا جوتیږي، چې دا کار په قصدي توګه سره شوی دی.
عیني شاهدانو رسنیو ته وویل، لومړی مو دا فکر کاوو، چې ښایي لارۍ له کنټرول څخه وتلې ده، خو له لږ ورنږدې کېدو وروسته مونږ لارۍ چلوونکی ولیدو، چې ږیره لري، او له دغه کار څخه خوند اخلي.
یوه پولیس سیمه ییز ټلویزیون ته وویل، چې د لارۍ د درولو هڅه یې وکړه، ډېرې نارې یې ورته وکړې، مګر لارۍ چلوونکي ده ته هېڅ توجه ورنه کړه، او خپل هدف ته یې ځان ورسوو.
پولیسو رسنیو ته ویلي دي، چې په لارۍ کې یې داسې اسناد موندلي دي، چې بریدګر فرانسوی او د نیس ښار اوسېدونکی ښيي.
د بریدګر نوم محمد لحوایج بو هلال یاد شوی دی، چې ۳۱ کاله عمر یې درلودو.
ویل کیږي، چې محمد لحوایج له کومې سخت دریځي ډلې سره تړاو نه درلود، خو له پولیسو سره وړاندې هم لاس او ګرېوان شوی وو.
رسنیو د بریدګر په اړه ویلي دي، چې د بریدګر نوم د پولسو تر څار لاندې لیست کې نشته دی.
د دغه هېواد د ملي امنیت شورا د پېښې په اړه له غونډې وروسته ولسمشر فرانسوا اولاند درې ورځينۍ ملي ماتم اعلان کړ.
دغه برید په نړیواله کچه وغندل شو، ټول مشران د دغه برید د قربانیانو سره په غمشریکۍ را غونډ شوي وو، او دا برید یې په کلکو ټکو وغندلو.
په ټویټر کې یوه ویډیو خپره شوې ده، چې د نړۍ ټول مشران سره را ټول شوي دي، او د یوې شېبې لپاره چوپه خوله ولاړ دي.
افغان ولسمشر اشرف غني هم د یوې خبرپاڼې په خپرولو سره دغه برید یو «وحشتناک جنایت» بللی دی.
امریکایي ولسمشر اوباما دا یو «ترهګریز برید» وبللو، او ویې ویل، چې دوی د قربانیانو له کورنیو سره په غم کې شریک دي.
د امریکا د بهرنیو چارو وزیر جان کیري په دغه غونډه کې وویل، چې دوی په دغه برید خفه دي، او امریکا د فرانسې تر څنګ ده.
همدا راز دغه برید د ترکیې لومړي وزیر رجب طیب اردوغان، د اروپايي شورا مشر ډونالډ ټسک، د چین یوه چارواکي لي کینګیانګ، د امريکا د ولسمشريزو ټاکنو لپاره د جمهوري غوښتونکي ګوند نوماند ډونالډ ټرمپ، د جاپان لومړي وزیر شنزو ابي، د بریتانیا نوې لومړۍ وزیرې تېریزا مې، د کاناډا لومړي وزیر جسټین تروډو او د اسټرالیا لومړي وزیر مالکولم ټرنوبل یو خطرناک، د فرانسې لپاره غم ناک، وېروونکی او نه بښوونکی بللی دی.
باید ووایو، د روان میلادي کال په جون میاشت کې هم پارېس ته څېرمه مګناویل ته څېرمه برید کې دوه پولیس ووژل شول.
د یادولو ده، چې فرانسویانو په افغانستان کې له امریکا سره یو ځای ډېری افغان ملکي وګړي ځورولي، او په خپلو شخصي جیلونو کې یې شکنجه کړي دي، فرانسویان له مسلمانانو سره روایتي دښمني هم لري، چې په هېواد کې په اکثره مسلمانانو د تبلیغ او دعوت مخه نیول کیږي.
