ترکیه کې د تېرې شپې د ناکامې کودتا له امله، د مرګ ژوبلې او د نیول شویو کودتاچیانو شمېر لوړ شو

کابل ټکی کام ۲۶چنګاښ/۱۳۹۵، سمسور ګیلاني
تېره شپه د ترکیې د پوځ یوې ډلې د دغه هېواد پر ولسمشر رجب طیب اردوغان د کودتا هڅه وکړه، مګر له ناکامۍ سره مخ شوه، په لومړیو کې د رسنیو له لارې د وژل شویو شمېر ۶۰ تنه او د نیول شویو کودتاچیانو شمېر ۷۵۴ یاد شوی وو، مګر دا مهال د دواړو شمېر لوړ شوی دی.
د ترکیې لومړي وزیر بن علي یلدیریم په دغه هېواد کې د کودتا له ناکامۍ وروسته یوې خبري غونډې ته وویل، «په ډېره خواشینۍ سره د وژل شویو شمېر ۱۶۱ تنو ته او د ټپیانو شمېر ۱۴۴۰ تنو ته لوړ شوی دی.».
نوموړې وویل، چې لا تر دا مهاله پورې ۲۸۳۹ کودتاچیان نیول شوي دي.
ښاغلي یلدیریم ویلي دي، چې نیول شوي کودتاچیان عدالت ته سپارل شوي دي، او لازمه جزا به وویني.
ده د کودتا تور په فتح الله ګولن پورې کړ، او زیاته یې کړه، چې دا مهال په هېواد کې د ژوند چارې بېرته عادي حالت ته راګرځېدلي دی، او حکومت د دوی په لاس کې دی.
ښاغلي یلدیریم د تېرې شپې پېښې قربانیانو ته له الله تعالی څخه د مغفرت او کورنیو ته یې د صبر غوښتنه وکړه.
ده د قربانیانو له کورنیو سره ژمنه وکړه، چې نه به دوی او نه به یې «شهیدان» هېر کړي.
یلدریم له هغو هېوادونو او ګوندونو څخه مننه وکړه، چې له دوی څخه یې ملاتړ اعلان کړی دی.
ترکي رسنیو چې شېبه وړاندې تازه معلومات خپاره کړل، ویلي یې دي، چې لوی درستیز جنرال خلوصي اکار نن سهار د ځانګړو عملیاتو په ترڅ کې ژغورل شوی دی.
ستر درستیز جنرال خلوصي د تېرې شپې راهیسې د کودتاچیانو له خوا یرغمل شوی وو.
د یادولو ده، په ۱۹۹۳ میلادي کال کې هم په ترکیه کې د (پټې کودتا) تر نامه لاندې هڅې وشوې، چې موخه یې د کردي کارګرو له ګوند (پ ک ک) سره د سولې د هڅو ناکامول وو.