د کندوز قلعه زال کې نن درېیمه ورځ هم درنده جګړه روانه ده

کابل ټکی کام ۳۰چنګاښ/۱۳۹۵، احمدالله مهاجر
د روانې چنګاښ میاشتې په ۲۸ مه نېټه د دوشنبې په ورځ لسګونه طالبانو د کندوز ولایت قلعه زال ولسوالۍ پر مرکزي ودانۍ او شاوخوا ټولو امنیتي پوستو باندې ځپوونکي بریدونه وکړل، چې نن درېیمه ورځ هم پکې درنده جګړه دوام لري.
طالبانو تېره ورځ د دغې ولسوالۍ شاوخوا ټولې امنیتي پوستې ونیولې، او له پرون ورځې راهیسې یې مرکز ته تښتېدلي عسکر، پولیس او اربکیان تر خپلې کلکې محاصرې لاندې راوستي دي.
طالبانو په یوه خبر پاڼه کې دعوه کړې ده، چې یو ټانګ او پکې سپاره عسکر یې د یوه راکېټ په مټ له منځه وړي دي.
له سیمې څخه کابل ټکي کام ته را رسېدلی خبر وایي، چې په مرکز کې محاصره عسکر، پولیس او اربکیان له ډېر سخت حالت سره مخ دي، او د محاصرې کړۍ شېبه په شېبه پرې تنګیږي.
دا په داسې حال کې چې تېره ورځ دولتي چارواکو دعوه وکړه، چې د کندوز قلعه زال کې یې د طالبانو بریدونه په شاه تمبولي دي.