کابل ټکی کام جمعه، زمری ۹، ۱۳۹۵ل
راپورتر بصیراحمد پاڅون
تیره شپه د ګرمسیر ولسوالۍ په بینادر سیمه کې طالبانو یو شمیر پوستې او یو ستر پوځي پنډغالۍ نیولي چې دفاع وزارت یې د بیرته نیولو لپاره کومانډو عسکرسیمې ته ولیږل.
کوماندو ځواکونه ګرمسیرته په رسیدو له نورو وسلوالو ځواکونو سره یوځای شول او پر طالبانو یې د نن ورځې په اوږدو کې درې ځله تعرضي بریدونه وکړل.
طالبان وایي چې درې واړه بریدونه یې پرشا تمبولي، ۳ تنه عسکر یې وژلي، د یو تانګ په شمول یې یو شمیر سپکې او درنې وسلې هم ولجه کړي دي.
د دفاع وزارت ویاند دولت وزیري رسنیو ته ویلي چې طالبانو ته یې د سر درانه زیانونه اړولي خو طالبان یې دا ادعا په دروغو لیکه کوي.
له خانشین ولسوالۍ وروسته طالبانو په ګرمسیر ولسوالۍ کې ګړندی پرمختګ پیل کړی، حکومتي او امریکایي هڅه کوي چې طالبان پر شا وتمبوي خو تر اوسه نه دي بریالي شوي.
بل خوا د بدخشان او کندهار ولایتونو نه په رارسیدلي راپورونو کې ویل شوي چې حکومتي ځواکونو پر طالبانو تعرضي بریدونه کړي دي.
طالبان ادعا کوي چې د بدخشان په راغستان کې یې د اردو شپږ ټانګونه له منځه وړي ۸ تنه عسکر یې وژلي او لس تنه یې ټپیان کړي طالبان وایي چې په راغستان کې یې د اردو تعرضي ځواکونه محاصره کړي دي.
همدغه راز یې د کندهار په معروف ولسوالۍ کې یوه پوسته نیولي او مرستندویه ځواکونه یې پر شا تمبولي دي.
ښاغلي وزیري په بدخشان او کندهار ولایتونو کې هم د طالبانو د ځپلو خبره کوي خو عیني شاهدان وایي چې تر اوسه طالبان لاس بري دي.
