(کابل ټکی کام ۱۳۹۵ زمری ۱۲) زرغون خوږیاڼی
د افغانستان د ولسمشر لومړي مرستیال په انقره کې د ترکیې له صدراعظم سره د بندو دروازو ترشا خبرې وکړې.
د ترکیې رسمي خبري اژانس اناتولیا ويلي، چې د دغه هیواد لومړي وزیر ییلدرم د افغانستان د ولسمشر د لومړي مرستیال عبدالرشید دوستم سره د چانکایا په ماڼۍ کې لیدنه وکړه.
د ترکيې د صدارت ماڼۍ د خبر له مخې، لومړي وزیر بنعلي ییلدرم پدې لیدنه کې په ترکیه کې د جولای د ۱۵ مې د فتح الله ګولن ترهګریز سازمان د کودتا د ناکامې هڅې په اړه د افغانستان د خلکو لخوا د ترکیې د دولت او ملت نه د ښودلي ملاتړ له امله مننه وکړه.
د یادونې وړ ده، چې په ترکیه کې د نامې کودتا پر ضد او د ترکیې د ولسمشر رجب طیب اردوغان په ننګه په کابل او جوزجان کې یو لړ لاریونونه هم وشول.
د ترکیې د خبري سرچینو له مخې ویل شوي، چې د ترکیې صدراعظم د ترکیې له ملت او دولته څخه د افغانستان د حکومت او ملت د ملاتړ مننه وکړه.
لومړي وزیر ییلدرم پدې لیدنه کې د افغانستان سره په هرو برخو کې د ترکیې د مرستو دوام ژمنه وکړه او افغانستان د سولې او ثبات په اهمیت يي ټینګار وکړ. هغه وویل چې افغانستان د ترکیې لپاره یواځې دوست هیواد نه بلکې ورور هیواد دی.
د افغانستان مرستیال ولسمشر عبدالرشید دوستم په وینا، په سیمه کې د ترکیې رول خورا مهم او اغیزمن دی هغه ویلي دي، چې د متقابلو اړیکو د لا پراخولو په خاطر به هڅو ته دوام ورکړي.
تر اوسه دا معلومه نه چې، د افغانستان د ولسمشر لومړی مرستیال ددغه سفر موخه څه وه؛ خو دا لیدنه د مطبوعاتو نه د بندو دروازو ترشا ترسره شوې ده.
سیاسي چارو شنونکي بیا وايي، چې ترکیه د دوستم یواځینی د پناه ځای دی، چې کله هم د افغانستان حالت دده لپاره مناسب ونه بریښي نو د ترکیې په لور مخه کوي.
