(کابل ټکی کام ۱۳۹۵ زمری ۱۶) زرغون خوږیاڼی
طالبانو ویلي، چې تیر مازدیګر ۵ بجې یې د کندوز ولایت د امام صیب په ولسوالۍ او د نواباد په امنیتي پوستو د سپکو او درندو وسلو برید وکړ، چې د شپې تر ناوخته یې دوام وکړ، طالب ویاند زیاتوي، چې په دې جګړه کې یې په امام صیب ولسوالۍ کې یې ۴ پوستې ونیولې او همدارنګه په نواباد کې یې د ۵ پوستو په شمول پراخه سیمه نیولې ده.
طالب ویاند ویلي، چې په دې جګړه کې یې د درې مهمو قومندانانو په شمول ۹ حکومتي عسکر وژلي او ۳ نور یې ټپیان کړي دي، ویاند زیاته کړې ، چې په یاده جګړه کې یو شمېر عسکر ورته تسلیم شوي، چې د دعوت ارشاد کمیسیون لخوا یې هر کلی شوی دی.
دوی ادعا کړې ، چې له ۹ پوستو څخه یې څو عرادې زغروال ټانګونه او یو لړ د سپکو او درندو وسلو غنیمتونه هم لاسته راوړي دي.
طالبانو په یاده جګړه کې د خپلو ۲ ملګرو د ژلو خبر هم ورکوي او وایي، چې ۵ نور ژوبل شوي دي.
بلخوا د کندوز سیمه اییز چارواکي د طالبانو ادعا ناسمه بولي، دوی جګړه تائيدوي او وايي چې په یادو نښتو کې ۱۵ طالبان وژل شوي او تر ۱۶ نور ټپیان دي.
د کندوز سیمهییز چارواکي وايي چې د امنیتي ځواکونو په عملیاتو کې ۱۵ طالبان وژل شوي او ۱۶ دنور ټپيان دي.
په سیمه کې د ۲۰۱ قول اردو ویاند ویلي، چې له پرون راهیسې په یو لړ تعرضی عملیاتو کې يې له طالبانو څخه څو کلي او ځینې سیمې نیولي دي.
