(کابل ټکی کام ۱۳۹۵ زمری ۱۷) زرغون خوږیاڼی
د لاس انجلس ټایمز ورځپاڼې لیکوال انډروباسیفتیش لیکلي، چې د امريکا افغان جگړه تر ټولو اوږده او ناکامه جگړه ده، نوموړي د ولسمشریزو ټاکنو له دواړو نوماندانو غوښتي، چې د افغان جگړې په اړه خپل دريځ روښانه کړي.
لیکوال په خپله لیکنه کې ویلي، چې د جمهوري ګوند نوماند ډونلډ ټرمپ او د ديموکراتانو ګوند نوماندې هيلري کلنټن تر اوسه په خپلو ټاکنيزو ويناوو کې د افغان جگړې په اړه هېڅ نه دي ويلي.
ليکوال د دواړو نوماندانو په اړه نیوکه کړې، چې له هېواد څخه بهر د امریکا د پوځي مداخلو او جگړو په اړه انتقادي او روښانه نظر نه وړاندې کوي او نه هم خپل ولس ته د افغانستان او نورو جگړو په اړه څه ډاډ ورکولای شي.
ليکوال په افغانستان کې د امريکا لخوا د پيل شوې جگړې په اړه وايي، چې امريکايي ولس د ولسمشريزو ټاکنو له دواړو نوماندانو غواړي، چې د دې جگړې په اړه خپل دريځ روښانه کړي، چې «ايا امريکا دغه جگړه گټلی شي که نه! امریکيي ولس د دغې جگړې د پای په اړه جواب اورېدل غواړي.«
ورځپاڼې لیکلي، ولسمشریزو ټاکنو ته دواړه نوماندان خپل ولس ته د افغانستان او نورو جگړو په اړه څه ډاډ نه شي ورکولای.
ليکوال انډرو باسيفيتش ليکلي، چې په افغانستان کې د امريکا جگړه شپاړسم کال ته ننوته او د امريکا راتلونکي ولسمشر ته به هم دغه جگړه په داسې حال کې په ميراث کې ورپاتې شي، چې هغه به يې هم په پای ته رسولو نه پوهېږي.
د ليکوال په وينا امريکا او ايتلافيان يې د پنځلسو کالو په اوږمهالې جگړه کې د افغانستان په هېڅ برخه کې لاسته راوړنې نه لري، سره له دې، چې زرگونه سرتيري ووژل شول او ميلیاردونه ډالر په دغه جگړه کې ولگول شول.
ليکوال په افغانستان کې د امریکا جګړه یوه ناکامه جګړه بولي او دا جګړه د امریکايي ولس په تاوان ګڼي، چې په افغانستان کې د امريکايي او ایتلافي پوځيانو قرباني او د ميلياردونو ډالرو لگښت ټول د امريکا په زيان تمام شوی دی.
امریکايي لیکوال په افغان حکومت هم نیوکه کړې: ((افغان حکومت په خپلو پوځي او ملکي چارو کې له اويا سلنه زيات پر بهرنيو مرستو ولاړ دی، په نړۍ کې هېڅوک پر افغان حکومت باور ته نه دي تيار، اداري فساد په کې اوج ته رسېدلی او د نشه يي توکو کښت په کې په تاريخي لحاظ تر بل هر وخت زيات دی)).
لیکوال وايي، په اوس وخت کې افغان طالبان د افغانستان تر ټولو غښتلی ځواک دی.
ليکوال له امريکايي چارواکي غوښتي، چې بايد د افغانستان جگړې ته د پای ټکی کېږي او خپل سرتيري له دغې جگړې راوباسي: افغانستان د امريکايي سرتېرو لپاره يو خونړی لابراتوار ګرځیدلی دی، چې تر اوسه په کې امريکايان د نامعلومې موخې لپاره قرباني کېږي.
امریکايي لیکوال وايي: امريکا د خپل دښمن په له منځه وړلو کې پاتې راغلې، د چا پر ضد چې امريکايي پوځيانو جگړې کولې، هغوی اوس د افغانستان په ډېری خاوره واکمن دي.
